Ұлттық банк сарапшылардың инфляцияға қатысты болжамдары әртүрлі сипатта өзгергені туралы ресми түрде хабарлайды. 2025 жылға арналған медианалық болжам 10,7%-дан 11%-ға өсті, 2026 жылға – 9,4%-дан 9%-ға төмендеді, 2027 жылға – 6,8%-дан 7%-ға көтерілді.
Респонденттердің пікірінше, базалық мөлшерлеме 2025 жылдың соңына дейін қазіргі деңгейде сақталады, бұл көрсеткіш бойынша медианалық болжам 16,3%-дан 16,5%-ға жоғарылады. 2026 жылға болжам – 14,5%-дан 14%-ға, 2027 жылға – 12%-дан 11,8%-ға төмендеді.
Еуразия24 берген түсініктеме:
Жақында Қолданбалы экономиканы зерттеу орталығының (AERC) бас директоры Жаныбек Айғазиннің сұхбаты жарық көрді. Онда сарапшы Ұлттық банк жүргізіп отырған ақша-кредит саясатының қалыпты түрде қатаң екенін атап өтті. Айғазиннің айтуынша, жоғары базалық мөлшерлемені сақтау – инфляцияны тежеу әрекеті.
Дегенмен, мұндай саясаттың жағымсыз әсері де бар. Атап айтқанда, несие қымбаттайды. Бұл әсіресе шағын және орта бизнеске ауыр тиеді. Себебі көптеген жобалардың табыстылығы тартылған қаражаттың құнын ақтамайды. Соның салдарынан жеке инвестициялар бәсеңдеп, экономиканы дамытудағы мемлекеттік капитал салымдарының үлесі артуда.
Айта кетейік, инфляция болжамынан бөлек, Ұлттық банк бизнес белсенділігінің индексін де жариялады.
Монетарлық реттеуші хабарлағандай, 2025 жылдың маусым айында іскерлік белсенділік төмендеп, индекс 50,6 деңгейінде қалыптасты (мамыр айында – 51,4).
Сонымен бірге, Бизнестің ахуалын бағалайтын индекс (ИБК) маусым айында 11,6-ға төмендеді, оған қазіргі жағдай мен болашаққа деген сенімділікке қатысты бағалаулардың әлсіреуі себеп болды.
Яғни, Қазақстанда экономиканың негізгі қозғалтқышы — жеке сектор емес, мемлекет болып қала береді. Бұл жағдайда инфляцияның табиғи нарық заңдары бойынша қалыптасуына сенім аз.
