Tengenomika хабарлайды: «2025 жылдың 30 қыркүйегінен бастап Қазақстанда кепілсіз онлайн-тұтынушылық несиелерге қатысты «ойлану кезеңі» енгізіледі. Бұл шараның мақсаты – қарыз алушыға шешімін таразылауға уақыт беру, осылайша несиені ойланбай рәсімдеу немесе алаяқтық схемаларға ілігу ықтималдығын азайту. Тәртіпке сәйкес, 150-ден 255 АЕК аралығындағы несиелер бойынша кемінде 8 сағаттық, ал 255 АЕК-тен жоғары сомалар (микрокредиттер үшін – 75 АЕК-тен жоғары) бойынша 24 сағаттық үзіліс қарастырылады. Қаражат қарыз алушы өз келісімін қайта растағаннан кейін ғана аударылады. Егер осы уақыт аралығында қарыз алушы шешімінен бас тартса, келісімшарттың күші жойылады. Бұған тауарлық несиелер, қайта қаржыландыру және 150 АЕК-ке дейінгі карталар кірмейді. Жаңа талап тек онлайн-қарыздарға қолданылады. Азаматтарда шұғыл қажеттілік туған жағдайда, олар банк немесе микроқаржы ұйымының бөлімшесіне жүгініп, күтпей-ақ несие ала алады. Бұл шаралар қаржылық қызмет тұтынушыларын қорғауға арналған жалпы жүйенің бір бөлігі. Алайда кең ауқымда алып қарасақ, тұтынушыны қорғау бір ғана мемлекетпен шектелмейді: қаржылық тәуекелдер мен алаяқтық схемалар заңға бағынбайды.
Евразия24 пікірі:
Қаржы нарығын реттеу және дамыту агенттігі (ҚНРДА) халықтың шамадан тыс қарызға батуының алдын алатын тиімді тетіктердің бірі ретінде көптен бері уәде еткен «несие үзілісін» жүзеге асырды. Енді қыркүйек айының соңынан бастап белгіленген уақыт өтпей 600 мың теңгеден жоғары онлайн-несиені бірден алу мүмкін болмайды. Бұл бастаманың екі қыры бар. Бір жағынан, құмар ойынға әуес жандар үшін де, алаяқтардың құрбанына айналмаудың амалы ретінде де өте орынды шешім. Ал екінші жағынан, белгілі бір қиындықтар да туындауы ықтимал: мысалы, шұғыл түрде әуе билетін немесе қонақүйді брондау қажет болғанда, не болмаса адамның дереу төленетін қымбат медициналық қызметке жүгінуіне тура келген жағдайда. Қысқасы, қарыз алушыға ақша кез келген сәтте – міндетті түрде банктің жұмыс уақытында емес – қажет болуы мүмкін. Сондықтан наразы тараптар табылары сөзсіз. Дегенмен, біздің ойымызша, бұл мемлекеттік шешімнің артықшылықтары кемшіліктерінен әлдеқайда басым.
