ҚР Президенті жанындағы Орталық коммуникациялар қызметінің хабарлауынша: «Елімізде жоғары білім алуға қолжетімділік деңгейі өте жоғары. Соңғы жеті жылда мемлекеттік білім беру тапсырысы аясында 655 мыңнан астам грант бөлінді. Бұл мақсатқа 1,5 трлн теңгеден астам қаражат жұмсалды. Бұл туралы Орталық коммуникациялар қызметінде өткен баспасөз мәслихатында ҚР ғылым және жоғары білім министрі Саясат Нұрбек мәлімдеді. Министрдің айтуынша, соңғы бес жылда шәкіртақы мөлшері кемінде екі есе, ал жеті жыл ішінде 2,5 есе артқан. Бұл бағыттағы жұмыс алдағы уақытта да жалғасады. «Шетелдік студенттерге келсек, 4,5–5 жыл бұрын қолға алған стратегиямыз өз нәтижесін беріп жатыр. Бес жыл ішінде Қазақстанда білім алатын шетелдік студенттер саны 41 мыңға жуықтады. Бұл – бұрын-соңды болмаған рекордтық көрсеткіш. Қазақстанның аймақтағы академиялық орталық ретінде қалыптасқанын нық сеніммен айта аламыз», – деді Саясат Нұрбек баспасөз мәслихатында».
Еуразия24 пікірі:
Жеті жыл ішінде білім беру гранттарына 1,5 трлн теңгеден астам қаражат бөлінген. Бұл – қомақты қаржы. Есептеп көрсек, бір грантқа шамамен 2,3 млн теңгеден келеді. Алайда біздіңше, басты мәселе білім алуға жұмсалған қаражаттың көлемінде емес, мемлекет тарапынан адами капиталға салынған инвестицияның қаншалықты нәтиже бергенінде.
Салық төлеушілердің есебінен білім алған жүздеген мың жастың қаншасы бүгінде мамандығы бойынша жұмыс істеп жүр? Олардың қаншасы лайықты жалақы алады? Жалпы, қаншасы жұмысқа орналаса алды?
Мемлекеттік білім беру тапсырысын жыл сайын ұлғайтып, шәкіртақыны көтеруге, жаңа білім беру бағдарламаларын ашуға болады. Бірақ жоғары оқу орнын бітірген жастардың көбі диплом алғаннан кейін курьер, такси жүргізушісі немесе даяшы болып жұмыс істесе, мемлекет қаржыны қандай мақсатқа жұмсады деген сұрақ туады. Еңбек нарығында сұранысқа ие маман даярлау үшін бе, әлде грант жеңіп алған әрбір жастың диплом алуына жағдай жасау үшін бе?
Ғылым және жоғары білім министрлігінің мәліметінше, 2026 жылы 1 маусымдағы жағдай бойынша 2025 жылы жоғары оқу орындарын бітірген түлектердің 68,7%-ы ресми түрде жұмысқа орналасқан. Ал 2024 жылғы түлектер арасында бұл көрсеткіш 75,2% болған. Демек, жұмысқа орналасу деңгейі 6,5 пайыздық тармаққа төмендеген. Сонда мемлекет жастарды оқытуға қанша қаржы жұмсағанын нақты білгенімен, даярланған мамандарға еңбек нарығында қаншалықты сұраныс барын және түлектердің жұмысқа орналасу көрсеткіші неге төмен екенін дәл айта алмай отыр.
