Informburo.kz «31 арнаға» сілтеме жасап хабарлағандай, ипотека нарығындағы жағдайды түбегейлі өзгертуі мүмкін жаңа бастама ұсынылуда. Қаржы нарығын реттеу және дамыту агенттігі бастапқы жарнаның ең төменгі мөлшерін 10–20 пайыз деңгейінде белгілеуді ұсынуда.
Агенттік аталған бастама шынымен қарастырылып жатқанын растады. Дегенмен, нақты параметрлер мен мерзімдер әзірге жарияланбай отыр. Сарапшылардың болжауынша, егер бұл норма қабылданатын болса, тұрғын үйге деген сұраныстың азаюына алып келуі мүмкін.
Евразия24 пікірі:
Қазақстандағы ипотекалық нарықтың шамамен 60 пайызы «Отбасы банкінің» бақылауында. Мемлекеттік даму институты ретінде бұл банк халыққа қолжетімді ипотеканы ұсынуда басты рөлге ие. Енді ипотека бойынша бастапқы жарнаның ең төменгі шегін белгілеу нені білдіреді?
Бір жағынан, бұл коммерциялық банктердің шамадан тыс талаптарын тежейді. Олар жоғары бастапқы жарна арқылы өз тәуекелдерін азайтуды көздейді. Екінші жағынан, бастапқы жарна неғұрлым төмен болса, қаржылық тұрғыдан тұрақсыз азаматтардың ипотека алу мүмкіндігі соғұрлым артады. Ал Қазақстанда жалған жұмысқа орналасу мен тиісті аударымдарды рәсімдеу– қиын шаруа емес. Кейін ол қарыздардың салдарын мемлекет шешуге мәжбүр болады.
2008–2009 жылдардағы ипотекалық дағдарыс тәжірибесі әлі ұмытылған жоқ. Сондықтан мемлекет нарыққа тағы да араласуы керек пе – бұл өте маңызды, әрі мұқият талқылауды қажет ететін мәселе. Оның үстіне, қазіргі кезде ипотекалық нарықтың көлемі небәрі 40 пайызға дейін қысқарғанын ескерген жөн.
