Алматы әкімдігі хабарлайды: «Медеу» мен «Шымбұлаққа» көлікпен кіру тәртібі жаңартылады. Алматы мәслихатының депутаттары ерекше қорғалатын «Медеу» және «Шымбұлақ» табиғи аумақтарына көлік құралдарының кіруін шектеудің жаңа тәртібін қолдады. Шектеу іштен жанатын қозғалтқышы бар автокөліктерге қатысты болады. Электромобильдердің жұмыс күндері кіруіне рұқсат етіледі, ал демалыс және мереке күндері оларға да шектеу қойылады. Өзгерістер Конституциялық Соттың 2026 жылғы 12 маусымдағы қаулысына байланысты енгізіліп отыр. Оған сәйкес, мұндай шектеулерді белгілеу мәслихаттың құзыретіне жатады және тұрғындардың құқықтары ескерілуге тиіс. Жаңа тәртіп көлік ағынын азайтып, табиғи аумақты сақтауға бағытталған. Бақылау-өткізу бекеті арқылы тәулігіне шамамен 700 автокөлік өтеді. 2026 жылдың сегіз айында 179 мыңнан астам көліктің өткені тіркелген. Бұл ретте аталған аумақта тұратын тұрғындарға, сондай-ақ жедел, коммуналдық және арнаулы қызметтердің көліктеріне шектеу қолданылмайды.
Еуразия24 пікірі:
«Медеу» мен «Шымбұлаққа» автокөлікпен кіруді шектеу мәселесі төңірегінде ұзақ пікірталасуға болады. Таулы аймақты шамадан тыс көлік жүктемесінен қорғау қажет екені сөзсіз. Алайда жаңа тәртіпке қатысты бір сауал туындайды: з қоршаған ортаға зиянды қалдық шығармайтын электромобильдердің демалыс күндері жүруіне не себепті тыйым салынады? Конституциялық Сот бұған дейін көлік қозғалысын шектеу тәртібін қараған кезде экологияны қорғау мақсатының конституциялық тұрғыдан маңызды екенін тікелей атап өткен. Сонымен қатар мұндай шектеулер азаматтардың құқықтары мен заңды мүдделерін ескеруге және оларға шамадан тыс ауыртпалық түсірмеуге тиіс екенін көрсеткен. Бұл жерде экологиямен қатар туризмге қатысты мәселе де туындайды. Соңғы жылдары мемлекеттік деңгейде тау туризмін ауқымды дамыту мәселесі көтеріліп келеді. 2026 жылғы мамырда мәслихат Алматы тау кластері мен Almaty Superski жобаларын талқылады. Бұл жобалар заманауи әрі жыл бойы жұмыс істейтін тау инфрақұрылымын қалыптастыруды, жаяу туристік және велосипед бағыттарын, сондай-ақ басқа да демалыс түрлерін дамытуды көздейді. Қала билігінің қосымша дәлелдері болуы да мүмкін. Мәселен, мәселе зиянды шығарындыларды азайтуда емес, жалпы көлік ағынын тежеуде, автотұрақтарға түсетін жүктемені немесе табиғи аумаққа адам әсерін азайтуда болуы ықтимал. Егер мақсат осы болса, оны ашық әрі нақты түсіндірген жөн. Өйткені қазіргі жағдайда шектеуді тек экологиялық себептермен түсіндіру қисынсыз көрінеді.
