Kazinform агенттігінің хабарлауынша: «Құрылтай Жүктерді халықаралық автомобильмен тасымалдау шарты туралы конвенцияны (КДПГ) ратификациялау жөніндегі заңды екі оқылымда қабылдады. Құрылтайдың бейінді комитетінің қорытындысында атап өтілгендей, конвенция 1956 жылғы 19 мамырда Женевада қабылданған. Құжат халықаралық жүк тасымалдау шарттарын реттеудің әлемдік тәжірибеде қалыптасқан ортақ ережелерін белгілейді. Атап айтқанда, конвенция халықаралық автомобиль тасымалына қатысты шарттарды жасасу, орындау және бұзу тәртібін айқындайды. Сондай-ақ тасымалдаушының шарттық міндеттемелерді орындамағаны немесе тиісінше орындамағаны үшін жауапкершілігін қарастырады. Конвенцияға 58 мемлекет, оның ішінде Тәуелсіз Мемлекеттер Достастығына мүше елдердің барлығы қатысады. Комитет қорытындысында конвенцияны ратификациялау қазақстандық және шетелдік тасымалдаушылардың жұмыс істеу шарттарын біріздендіруге, олардың жауапкершілігін, талап қою және хабарлама жолдау мерзімдерін айқындауға, сондай-ақ халықаралық автомобиль тасымалы шарттарын жасасудың бірыңғай ережелерін қалыптастыруға бағытталғаны көрсетілген. Құжатты ратификациялау Қазақстанның конвенцияға қатысушы мемлекеттермен экономикалық ынтымақтастығын нығайтуға ықпал етеді деп күтілуде».
Еуразия24 пікірі:
Бұл – Қазақстанның халықаралық көлік дәліздерін ұзақ жылдар бойы дамытып, Еуразиядағы ірі транзиттік торапқа айналуды мақсат етіп отырғанын ескерсек, қызығушылық тудыратын жаңалық. Өйткені еліміз автомобильмен жүк тасымалдауды реттейтін негізгі халықаралық құжаттардың бірін енді ғана ратификациялап отыр.
Алайда конвенцияға қосылу мен оны ратификациялаудың аражігін ажырата білген жөн. Себебі Қазақстан бұл конвенцияға сонау 1995 жылы қосылған. Атап айтқанда, сол жылғы 12 мамырда президент КДПГ-ға қосылу туралы №2271 Жарлыққа қол қойды. 1995 жылғы 17 шілдеде Қазақстан қосылу жөніндегі құжатты БҰҰ депозитарийіне тапсырды. Ал 1995 жылғы 15 қазанда конвенция еліміз үшін күшіне енді.Демек, Қазақстан кемінде 1995 жылдан бері КДПГ ережелерін қолданып, солардың негізінде жүк жөнелтуші, тасымалдаушы және жүк алушы арасындағы қатынастарды реттеп келеді.
Енді Құрылтай практикалық маңызы зор тағы бір құжатты – 2008 жылы қабылданған конвенцияға электрондық халықаралық көлік жүкқұжатын (e-CMR) қолдану жөніндегі Қосымша хаттаманы мақұлдады. Бұл құжат қағаз түріндегі жүкқұжаттарды заңды күші бар электрондық нұсқалармен алмастыруға және жүктерді ресімдеуге кететін уақытты қысқартуға мүмкіндік береді.
