Астана. 20 желтоқсан. Интерфакс-Қазақстан — Қазақстан Жапониямен туризм бағытындағы өзара іс-қимылды дамытуға қызығушылық танытып отыр. Бұл туралы Қазақстан Президенті Қасым-Жомарт Тоқаев мәлімдеді.
Мемлекет басшысы сенбі күні өткен «Орталық Азия – Жапония» диалогының алғашқы саммитінде сөйлеген сөзінде туризм саласындағы ынтымақтастықтың басым бағыттарына тоқталды.
«Орталық Азия елдерінің барлығы бай тарихқа, өзіндік мәдени мұраға және көркем табиғатқа ие. Бұл құндылықтардың жапон туристері үшін тартымды болары сөзсіз. Қазақстан Жапониямен туризм саласындағы ынтымақтастықты кеңейтуге мүдделі», — деді Президент.
Қасым-Жомарт Тоқаевтың пікірінше, жапон туристері үшін Орталық Азияны қамтитын ортақ туристік бағыт әзірлеу, сондай-ақ Орталық Азия елдерінің азаматтарына қатысты визалық рәсімдерді жеңілдету орынды болар еді.
«Бұл Жапониядан келетін туристерге бір сапар аясында өңірдің бірнеше елін аралауға мүмкіндік береді, ал біздің азаматтар үшін Күншығыс елінің сұлулығы мен үйлесімін жақыннан тануға жол ашады», — деп атап өтті Мемлекет басшысы.
