Дубай. 20 желтоқсан. Интерфакс — Пәкістан соты сыбайлас жемқорлық ісі бойынша бұрынғы премьер-министр, «Әділет үшін қозғалыс» партиясының негізін қалаушы Имран Ханды қосымша 17 жылға түрмеге қамау туралы үкім шығарды. Бұл жөнінде сенбі күні Dawn басылымы хабарлады.
Сол іс аясында экс-премьердің жұбайы Бушра Биби де 17 жылға бас бостандығынан айырылды. Ол да қазіргі уақытта қамауда отыр.
Сот қаулысында үкім шығарылған кезде Имран Ханның жасы мен Бушра Бибидің әйел екені ескерілгені айтылған. Осы жайттарды назарға ала отырып, сот жеңілдік танытып, неғұрлым төмен жаза тағайындаған.
Тергеу деректеріне сәйкес, Имран Хан қызметтік жағдайын пайдаланып, 2021 жылғы мамырда Сауд Арабиясы үкіметінен сыйға алған зергерлік бұйымдарды мемлекеттік қоймаға өткізбеген. Аталған бағалы заттарды ол өз атына рәсімдеп, олардың нақты құнынан шамамен 14 есе төмен соманы ғана төлегені анықталған.
Имран Хан бірнеше бап бойынша, соның ішінде қызметтік өкілеттігін асыра пайдалану дерегі бойынша кінәлі деп танылды. Ерлі-зайыптыларға айыппұл да салынған. Айыппұл төленбеген жағдайда, қамаудағы мерзім одан әрі ұзартылады.
Пәкістанның ақпарат министрі Аттаулла Тарардың айтуынша, жаңа жаза бұрынғы үкім мерзімі аяқталғаннан кейін өтеледі. Атап айтқанда, 2025 жылғы қаңтарда сот Имран Ханды сыбайлас жемқорлық ісі бойынша 14 жылға, ал оның жұбайын жеті жылға бас бостандығынан айырған болатын.
«Әділет үшін қозғалыс» партиясы жаңа үкімді айыптап, оның сенімді дәлелдерге негізделмегенін мәлімдеді.
Еске сала кетейік, 2022 жылғы сәуірде Пәкістан парламенті Имран Ханға сенімсіздік вотумын жариялаған. Ол премьер-министр қызметін 2018 жылдан бері атқарып келген. 2023 жылғы тамызда сот оны сыбайлас жемқорлық үшін кінәлі деп танып, үш жылға бас бостандығынан айырды. Кейін ол өзге де айыптар бойынша бірнеше рет сотталған.
Имран Хан өз мәлімдемелерінде Пәкістан оппозициясы оны биліктен кетіру үшін Вашингтонмен астыртын келісімге барғанын, бұған оның Қытай мен Ресейге бейіл тәуелсіз сыртқы саясаты себеп болғанын бірнеше мәрте айтқан.
