Вашингтон. 20 желтоқсан. Интерфакс — АҚШ Қорғаныс министрлігі Сирия аумағында қарулы экстремистік топтарға тиесілі 70 нысанаға 100-ден астам дәлдігі жоғары соққы жасады. Бұл туралы АҚШ Орталық қолбасшылығы (CENTCOM) хабарлады.
Ресми мәліметке сәйкес, аталған әрекет өткен аптада Пальмира қаласы маңында екі америкалық әскери қызметкер мен бір аудармашының қаза табуына жауап ретінде жүзеге асырылған.
Hawkeye Strike деп аталған операция жұма күні АҚШ-тың шығыс жағалау уақытымен сағат 16:00-де басталған. Әскери қимылдарға F-15 жойғыш ұшақтары, A-10 шабуылдаушы ұшақтары, тікұшақтар, сондай-ақ HIMARS жоғары мобильді зымыран жүйелері тартылған. Сонымен бірге операцияға Иордания Әуе күштерінің ұшақтары да қатысқан.
АҚШ Президенті Дональд Трамп Сириядағы экстремистік топтарға қарсы соққылардың жасалғанын растады.
«Мен уәде еткендей, осы қылмысқа жауапты террористік топтарға қарсы АҚШ тарапынан қатаң жауап беріліп жатыр», — деп жазды Дональд Трамп Truth Social әлеуметтік желісінде.
Ал АҚШ Қорғаныс министрі Пит Хегсет X әлеуметтік желісінде жариялаған жазбасында:
«Бүгін АҚШ қарулы күштері Сирия аумағында экстремистік топтардың жауынгерлерін, инфрақұрылымын және қару-жарақ қоймаларын жоюға бағытталған Hawkeye Strike операциясын бастады. Бұл 13 желтоқсанда Пальмира қаласында америкалық әскери қызметкерлерге қарсы жасалған шабуылға тікелей жауап», — деп мәлімдеді.
