Atameken Business хабарлауынша: «Салық реформасынан кейін бизнестің табыстылығы 6%-дан 1%-ға дейін төмендеген. «Атамекен» ҰКП ШОБ-ты дамыту комитетінің төрайымы Гүлбану Майгарина Atameken Business forum алаңында сөз сөйлеп, салық реформасынан кейін кәсіпкерлер табысының күрт қысқарғанын мәлімдеді. Оның айтуынша, бизнестің табыстылық деңгейі 6%-дан 1%-ға дейін төмендеп, орташа сатып алу сомасы 30%-ға азайған. «Салық жүктемесінің артуы және сұраныстың төмендеуі кәсіпорындарды бөлшектенуге және қызметкерлерді қысқартуға мәжбүрлеп отыр», – деді Майгарина. Сонымен қатар ол еліміздегі жеңілдетілген салық жүйесінің ерекшелігіне тоқталып, кәсіпкерлер алдымен салық төлеп, тек содан кейін ғана таза пайда алатынын атап өтті. «Бізде қолданыстағы жүйеге сәйкес кәсіпкерлер табыс таппаса да, салық төлеуге міндетті. Сондықтан Салық кодексіндегі қолданыстағы нормаларды қайта қарап, бизнеске түсетін жүктемені ескеру маңызды. Сонымен қатар кәсіпкерлерге бизнесті жүйелі түрде, нақты есеп пен деректерге сүйене отырып жүргізу қажет. Басқару, маркетинг және кадр саясатына қатысты шешімдердің барлығы эмоцияға емес, нақты көрсеткіштерге негізделуі тиіс. Әйтпесе шағын және орта бизнес үшін құлдырау қаупі арта түседі. Қазіргі ахуалдың салдарынан, мысалы, біздің желіміздің өзінде қызметкерлер саны шамамен 25%-ға қысқарды. Бұл — саладағы көптеген кәсіпкерлерге тән ортақ үрдіс», – деді ол.
Еуразия24 пікірі:
24 ақпанда Еңбек және халықты әлеуметтік қорғау министрлігінде Премьер-министрдің орынбасары – Мәдениет және ақпарат министрі Аида Балаеваның төрағалығымен кеңейтілген алқа отырысы өтті. Осы жиында ведомство басшысы Асқарбек Ертаев мынадай мәлімдеме жасады: «Биыл сапалы жұмыс орындарының санын 3 млн 100 мыңға дейін жеткізуді, ал 2029 жылға қарай 3 млн 800 мыңға дейін арттыруды жоспарлап отырмыз. Өңірлік жұмыспен қамту карталары аясында 547 мың адамды, оның ішінде NEET санатындағы жастарды жұмыспен қамту көзделген. Жұмысшы мамандықтар жылының жалғасы ретінде сұранысқа ие мамандықтар — темір ұстасы, электрик, газкесуші және басқа да бағыттар бойынша 10 мыңнан астам азамат даярланады. SkillsEnbek платформасы арқылы шамамен 100 мың адамды оқыту жоспарланып отыр. Сонымен қатар Enbek.kz порталында 500 мың мектеп оқушысы мен техникалық және кәсіптік білім беру жүйесінің студенттері жұмыс іздеу дағдыларына оқытылады». Әрине, қағаз жүзінде бұл бастамалардың барлығы оң көрінеді, ал мемлекеттік органдар сапалы жұмыс орындарын құру жөніндегі ірі жоспарларын мәлімдеуде. Алайда бизнес өкілдері керісінше қызметкерлер санын қысқартып жатқанын айтуда. Нәтижесінде экономикада қауіпті тұйық үдеріс қалыптасып отыр: жұмыс орындарын ашу үшін бизнес табыс табуы тиіс; табыс табу үшін өнімін өткізуі керек; ал өткізу деңгейі халықтың төлем қабілетіне тікелей тәуелді. Халық табысы азайған сайын сұраныс төмендейді, бұл өз кезегінде компанияларды шығындарын қысқартуға, соның ішінде қызметкерлер санын азайтуға итермелейді. Мұндай жағдайда Үкімет тарапынан да баламалы тетіктер қарастырылып отырғаны анық.
