ҚР Оқу-ағарту министрлігі хабарлайды: «Оқу-ағарту министрі БҰҰ Бас хатшысының арнайы өкілімен кездесті. Мемлекет басшысы Қасым-Жомарт Кемелұлы Тоқаевтың бастамасымен Қазақстанда балалардың құқықтарын қорғауға, зорлық-зомбылықтың алдын алуға және әрбір баланың қауіпсіздігін қамтамасыз етуге бағытталған заңнамалық және институционалдық реформалар жүзеге асырылып жатыр. Осы мәселелер Оқу-ағарту министрі Жұлдыз Сүлейменованың Қазақстанға жұмыс сапарымен келген БҰҰ Бас хатшысының балаларға қатысты зорлық-зомбылық мәселелері жөніндегі арнайы өкілі Наджат Маалла Мджидпен кездесуінде негізгі тақырып болды. (…) Кездесуде балаларды қорғау жүйесінің инфрақұрылымын дамытуға ерекше көңіл бөлінді. Атап айтқанда, балалардың құқықтарын қорғау жөніндегі өңірлік басқармалар құру, қорғаншылық және қамқоршылық органдары мен психологиялық қолдау орталықтарының жұмысын жетілдіру, көмекке мұқтаж балаларды ерте анықтау және тиісті қызметтердің өзара іс-қимылын нығайту мәселелері талқыланды».
Еуразия24 пікірі:
Жуырда, 12 қазанда, вице-президент Ерлан Қарин балалардың құқықтары мен мүдделерін қорғау мәселелері бойынша кеңес өткізді. Жиында 2024 жылмен салыстырғанда балаларға қарсы жасалған аса ауыр қылмыстар саны 45%-ға, кәмелетке толмағандардың жыныстық тиіспеушілігіне қарсы қылмыстар 10%-ға азайғаны айтылды. Сонымен қатар кәмелетке толмағандардың өздері жасаған қылмыстар саны да 10%-ға төмендеген.
Бұл – мемлекет жүргізіп отырған жұмыстың тиімділігін көрсететін ең маңызды нәтижелердің бірі деуге болады.
Әрине, Қазақстанда балаларға қатысты барлық мәселе шешілді деп айтуға әлі ерте. Жасөспірімдер арасындағы агрессия, семіздік салдарынан мектеп жасындағы балалардың денсаулығының нашарлауы, балалар арасында психикалық бұзылыстардың көбеюі сияқты мәселелер әлі де өзекті. Дегенмен мемлекеттің бұл проблемаларды мойындап, жекелеген қайғылы оқиғаларға жауап қатумен шектелмей, балаларды қорғаудың тұрақты жүйесін қалыптастыруға көшкені маңызды.
Келесі жылы «Қазақстан балалары» 2026–2030 жылдарға арналған тұжырымдамасының тиімділігі туралы алғашқы қорытындылар жасауға мүмкіндік туады.
