Қазақстан Республикасы Ішкі істер министрлігінің хабарлауынша, 2026 жылы 25 тамыздан бастап «Жол жүрісі туралы» Қазақстан Республикасының Заңына енгізілген өзгерістер күшіне енеді. Ең алдымен, 65 жастан асқан жүргізушілер мен мүгедектігі бар жүргізушілер міндетті медициналық тексеруден екі жылда бір рет өтуге тиіс. Міндетті медициналық тексеруден өткені туралы мәліметтер Денсаулық сақтау министрлігі мен Ішкі істер министрлігінің ақпараттық жүйелері арасында автоматты түрде алмасады. Егер мемлекеттік ақпараттық жүйеде жүргізушінің медициналық тексеруден өткені және көлік құралын басқаруға медициналық қарсы көрсетілімдерінің жоқтығы расталмаса, оның көлік құралын басқару құқығы тоқтатылады. Сонымен қатар, алкогольдік, есірткілік немесе уытқұмарлық масаң күйде көлік басқарғаны үшін жауапкершілік күшейтілді. Енді қылмыстық іс жәбірленушімен татуласуына байланысты тоқтатылған жағдайда да, құқық бұзушы сегіз жылға көлік құралын басқару құқығынан айырылады. Ал жүргізуші куәлігі жоқ азаматтар осы мерзім ішінде оны ала алмайды.
Еуразия24 пікірі:
Қазақстанда жүргізуші куәлігі енді бір рет алып, он жыл бойы денсаулық жағдайының өзгергеніне қарамастан пайдалана беретін құжат болудан қалып барады. Әсіресе жасы ұлғайған немесе денсаулығына байланысты қосымша медициналық бақылауды қажет ететін азаматтарға қойылатын талап күшейеді. Өйткені жолдағы қауіпсіздік жүргізушінің жол қозғалысы ережелерін білуі мен көлік басқару дағдысына ғана тәуелді емес. Уақыт өте келе көру және есту қабілеті, реакция жылдамдығы, жүйке жүйесінің жай-күйі мен басқа да медициналық көрсеткіштер өзгеруі мүмкін. Мас күйінде көлік басқарғаны үшін жауапкершіліктің күшейтілуінің де өзіндік негізі бар. Өйткені мас жүргізушінің қолындағы көлік кез келген сәтте қоғамға қауіп төндіретін құралға айналуы ықтимал. Сондықтан жәбірленуші тараптың кінәлі адамға талабының болмауы мұндай құқық бұзушылықтың қоғамдық қауіптілігін төмендетпейді. Айта кетейік, бұған дейін әкімшілік рақымшылық жарияланған кезде жүргізуші куәлігінен айырылған азаматтардың бір тобы жазаны жеңілдетуді сұрап петиция жариялаған болатын. Онда көлік басқару құқығынан айыру мерзімін бір жылдан жеті жылға дейін икемді белгілеу, сондай-ақ балама жаза ретінде айыппұл немесе әкімшілік қамақ қолдану ұсынылған. Алайда 2026 жылы наурызда Алматыдағы әл-Фараби даңғылында Александр Пактың қатысуымен болған жол апатынан үш адамның қаза табуынан кейін қоғамда керісінше талап күшейді. Қазақстандықтар жаңа петиция жариялап, мас күйінде адам өліміне әкелген жол-көлік оқиғаларын қасақана жасалған қылмыстармен теңестіріп, мұндай әрекеттер үшін бас бостандығынан айыру мерзімін 15 жылға дейін ұзартуды ұсынды. Әзірге Ішкі істер министрлігі мас күйінде көлік басқарғаны үшін жүргізуші куәлігінен айыру мерзімін жеті жылдан сегіз жылға дейін ұлғайтумен шектелді.
