Саясаттанушы Алмас Әубекеровтің мәліметінше: «Құрылтайға кандидаттар қай өңірлерде тұрады? Орталық сайлау комиссиясы жариялаған партиялық тізімдерде кандидаттардың қазіргі тұрғылықты жері де көрсетілген. Мәліметке сәйкес, Астана қаласында – 223 кандидат, Алматы қаласында – 79, Шымкентте – 24 кандидат тұрады. Өңірлер бойынша Қарағанды облысында – 18, Солтүстік Қазақстан облысында – 16 кандидат тіркелген. Ақмола, Алматы, Атырау, Батыс Қазақстан, Жамбыл және Павлодар облыстарының әрқайсысында – 14 кандидаттан, Қостанай, Маңғыстау және Жетісу облыстарында – 13-тен, Ақтөбе, Қызылорда және Абай облыстарында – 12-ден, Түркістан облысында – 11, Шығыс Қазақстан облысында – 8, ал Ұлытау облысында 7 кандидат тұрады. Жалпы 501 кандидат, яғни шамамен 91,9%-ы, еліміздің 20 ірі қаласында (республикалық маңызы бар қалалар мен облыс орталықтарында) тұрады. Ал небәрі 44 кандидат (8,1%) ауылдық жерлер мен шағын қалалардың тұрғындары. Олардың қатарында Арқалық, Арыс, Қаскелең, Кентау, Қосшы, Курчатов, Сарыағаш, Сәтбаев, Талғар, Текелі, Теміртау, Шу және Екібастұз қалалары бар».
Еуразия24 пікірі:
Кандидаттардың тұрғылықты жері туралы мәлімет жарияланғаннан кейін Құрылтайдың алғашқы құрамы негізінен ірі қалаларда қалыптасатын сияқты әсер қалдырады. Бұл қалыпты құбылыс па? Бір жағынан, иә. Қазақстанда мемлекеттік басқару, бизнес, азаматтық қоғам институттары, сарапшылық орта және саяси өмір негізінен ірі қалаларда шоғырланған. Заң шығару қызметімен айналысу, саяси үдерістерге қатысу және партиялардың назарына ілігу үшін көп жағдайда адамға елордаға немесе облыс орталығына қоныс аударуға тура келеді. Алайда екінші жағынан, мынадай заңды сұрақ туындайды: егер кандидаттардың шамамен 92%-ы қалаларда тұрса, онда болашақ Құрылтай ел халқының үштен бірінен астамы тұратын ауылдық өңірлердің мүддесін қаншалықты толық әрі тиімді қорғай алады? Бұл статистиканың өзі көп жайтты аңғартады. Қазақстан тарихында ауылдың орны әрдайым айрықша болды. Ұлттық зиялы қауымның, мемлекет және қоғам қайраткерлерінің, саясаткерлердің талай буыны дәл ауылдан шыққан. Күні кеше ғана саяси мансап ауыл әкімдігінде немесе ауыл шаруашылығы кәсіпорындарында еңбек етуден басталатын жағдайлар жиі кездесетін. Ал бүгінде жағдай өзгерген. Саяси жүйенің назарын аудару үшін адам билікке жақын саяси кеңістікте көрінуі керек. Ал ауылдан мұндай деңгейге жету барған сайын қиындай түскендей.
