ZTB News хабарлауынша, Қазақстанда психологиялық қызмет көрсету саласын реттеуге бағытталған жаңа заң қабылданды. Сенат мақұлдаған құжат жалған психологтардың, коучтардың және арнайы білімі жоқ өзге де «сарапшылардың» қызметіне бақылауды күшейтуді көздейді. Заңдағы негізгі жаңалықтардың бірі – психологтардың мемлекеттік тізілімін енгізу. Бұл тізілімге енбеген азаматтар психолог ретінде ресми қызмет атқара алмайды және өзін психолог деп таныстыру құқығына ие болмайды. Билік өкілдерінің түсіндіруінше, соңғы жылдары коучинг, тәлімгерлік немесе жеке даму қызметі деген атаумен кәсіби біліктілігі жоқ адамдардың психологиялық көмек көрсетуі жиілеген. Осындай мамандарға қатысты шағымдардың көбеюі заңнамалық талаптарды күшейтуге негіз болған. Енді психолог болып жұмыс істеу үшін бейіндік жоғары білім, расталған кәсіби біліктілік және тиісті сертификат қажет болады. Сонымен қатар бірыңғай этикалық кодекс пен кәсіби қызмет стандарттары енгізіледі. Билік бұл ретте маманның лауазымдық атауынан гөрі оның нақты көрсететін қызметіне басымдық берілетінін ерекше атап өтті. Яғни өзін коуч немесе ментор деп таныстырғанымен, егер ол клиенттердің психоэмоциялық жағдайына ықпал ететін қызмет көрсетсе, оның жұмысы да мемлекеттік бақылау аясында қарастырылуы мүмкін. Сондай-ақ жаңа заңға сәйкес психологтарға медициналық қызметпен айналысуға және дәрі-дәрмек тағайындауға тыйым салынады.
Еуразия24 пікірі:
Психологиялық көмек көрсету саласы көптеген дамыған елдерде әлдеқашан заңмен реттелген. Мәселен, Ұлыбритания мен Аустралияда психологтардың мемлекеттік тізілімдері жүргізіліп, бұл мамандықтың кәсіби мәртебесі заңмен қорғалған. Мұндай қызметпен айналысу үшін бейіндік білім мен расталған біліктілік талап етіледі. АҚШ пен Канадада да психологтардың қызметі лицензияланады және мамандар кәсіби стандарттарға сай ұзақ мерзімді даярлықтан өтуі тиіс. Еуропа елдерінің басым бөлігінде де психолог мамандығы реттелетін кәсіптердің қатарына жатады, ал бұл атақты пайдалану белгілі бір білім мен кәсіби талаптарды орындауға байланысты. Осы тұрғыдан алғанда, Қазақстан түбегейлі жаңа жүйе енгізіп отырған жоқ. Дегенмен соңғы жылдары кең тараған менталдық коучинг пен кәсіби біліктілігі жоқ «инфосығандардың» қызметіне назар аударып, бұл саланы құқықтық тұрғыдан реттеуге кіріскені – маңызды қадам. Психологтардың мемлекеттік тізілімі, бірыңғай этикалық кодекс және біліктілікке қойылатын талаптар бұл салаға кездейсоқ адамдардың келуіне тосқауыл қойып, азаматтарды кәсіби дайындығы жоқ мамандардан қорғауға мүмкіндік береді. Әрине, мемлекеттік тізілімнің өзі жалған мамандардың қызметін толық тоқтата алмайды. Олардың бір бөлігі басқа атаумен жұмысын жалғастыруы ықтимал. Соған қарамастан мемлекет азаматтарға маңызды бағдар ұсынып отыр: психологтың көмегіне жүгінер алдында оның дипломы мен кәсіби біліктілігін тексеру қажет. Ал одан кейін маманға сенім арту-артпау әркімнің өз таңдауы.
