Еспаева Қазақстандағы қазіргі саяси партияларды басқарып отырған жалғыз әйел көшбасшы атанды
Астана. 13 маусым. ИНТЕРФАКС-ҚАЗАҚСТАН – Қазақстан Парламенті Мәжілісі төрағасының орынбасары, Мәжіліс депутаты Дания Еспаева «Ақ жол» демократиялық партиясының төрағасы болып сайланды.
Тиісті шешім сенбі күні өткен партия съезінде қабылданды.
Бұған дейін партияның бұрынғы төрағасы Азат Перуашев өз еркімен өкілеттігін тоқтатып, оның орнына Дания Еспаеваның кандидатурасын ұсынған болатын.
«Біздің әріптесімізді, партиямыздың жарқын тұлғасын, қаржыгерді, банкирді, Мәжіліс төрағасының орынбасары Дания Еспаеваны ұсынамын. Ол – Қазақстанның қазіргі саясаты мен экономикасындағы жаңа үрдістер мен дәстүрлердің бастауында тұрған тұлға. Оның таланты, білімі, дұрыс шешім қабылдай білу қабілеті, батылдығы және өзгелер мүмкін емес деп санаған істерге алғаш болып қадам жасау қасиеті партиямызға жаңа серпін мен оң өзгерістер әкелетініне сенімдімін», – деді Перуашев.
Партия мүшелері бұл ұсынысты бірауыздан қолдады.
65 жастағы Еспаева Қазақстан тарихындағы президенттікке кандидат болған алғашқы әйел саясаткер ретінде белгілі. Ол 2019 жылғы 9 маусымда өткен кезектен тыс президент сайлауына қатысып, сайлаушылардың 5,2 пайыз дауысын жинап, үшінші орын алған.
59 жастағы Перуашев «Ақ жол» партиясын 2011 жылдан бері басқарған.
Еске салсақ, биылғы тамыз айында Қазақстанда бір палаталы парламент – Құрылтай сайлауы өтеді.
