Дубай. 23 маусым. ИНТЕРФАКС – АҚШ-пен санкцияларды алып тастау және бұғатталған активтерді босату жөніндегі барлық келісімдер іске асқан жағдайда, Иран 50 млрд долларға дейінгі қаражатқа қол жеткізуі мүмкін. Бұл туралы сейсенбі күні «Әл-Жазира» телеарнасы дереккөздерге сілтеме жасап хабарлады.
Телеарнаның мәліметінше, келіссөздер барысымен таныс дереккөздердің айтуынша, Дохада бастапқы кезеңде әрқайсысы 6 млрд доллардан тұратын екі транш бойынша келісімге қол жеткізілген. Қажетті құжаттарға қол қою рәсімі Швейцарияда өтуі тиіс болған. Ал Иран тарапының өкілі бұл үдерістің аяқталғанын мәлімдеген.
«Әл-Жазираның» хабарлауынша, алдағы 60 күн ішінде тағы 12 млрд доллар көлеміндегі қаражатқа қолжетімділік ашылуы мүмкін. Егер тараптар түпкілікті келісімге келсе, санкциялардың күшін жою мен қайтарылатын активтердің жалпы көлемі шамамен 50 млрд долларға бағалануы ықтимал.
Сонымен қатар, телеарнаның атап өтуінше, АҚШ бұл қаражаттың Ислам революциясы сақшылар корпусының иелігіне түсуін қаламайды. Вашингтонның ұстанымы бойынша, бұл қаржы азық-түлік пен медициналық тауарларды сатып алуға жұмсалуы тиіс. Сондай-ақ АҚШ аталған тауарлардың америкалық қаржы арналары арқылы және АҚШ-пен байланысты нарықтардан сатып алынғанын қалайды.
Алайда Тегеранның бұл талаптармен толықтай келіскен-келіспегені әзірге белгісіз.
Дүйсенбі күні АҚШ вице-президенті Джей Ди Вэнс Иран активтерін бұғаттан шығару мүмкін екенін мәлімдеді. Оның айтуынша, бұл қаражат ираншыл топтарды қаржыландыруға емес, мысалы, америкалық ауыл шаруашылығы өнімдерін сатып алуға бағытталуы керек.
