Лондон. 4 желтоқсан. ИНТЕРФАКС-ҚАЗАҚСТАН – Financial Times (FT) басылымының бейсенбі күнгі дерегінше, АҚШ билігі Қытай Халық Республикасының Мемлекеттік қауіпсіздік министрлігіне қарсы санкциялар енгізуді уақытша кейінге қалдырды. Бұл шешім Вашингтон мен Бейжің арасындағы сауда келіссөздеріне кедергі келтірмеу үшін қабылданған.
Басылым мәліметіне сәйкес, қазіргі және бұрынғы америкалық шенеуніктер Қытайдың аталған барлау қызметіне және оның Salt Typhoon деп аталатын хакерлік операциясын жүзеге асыруға тартылған мердігерлеріне қатысты санкциялар жоспары бар екенін айтқан. Алайда бұл жоспар екі ел арасындағы қарым-қатынасты тұрақтандыру процесін әлсіретпеу мақсатында тоқтатылған.
Сонымен қатар, дереккөздердің айтуынша, АҚШ президенті Дональд Трамп пен ҚХР төрағасы Си Цзиньпин қазан айының соңында Пусанда өткен келіссөздер барысында бірқатар сауда уағдаластықтарына қол жеткізгеннен кейін, Ақ үй Қытайға қарсы экспорттық шектеулерді кеңейтуден бас тартқан.
Кейбір дереккөздер Трамптың Қытайдан сирек кездесетін металдарға тәуелділікті төмендеткенге дейін екіжақты қатынастардағы тұрақтылықты сақтағысы келетінін мәлімдеген. Сонымен бірге, президент 2026 жылдың сәуіріне жоспарланған Бейжіңге сапар алдында жағдайды ушықтырмауға тырысып отыр.
Екі дереккөздің мәліметінше, Ақ үй таяуда әкімшілік аппараты басшысының орынбасары Стивен Миллерге Қытайға қатысты саясатты үйлестіру, сондай-ақ екі ел арасындағы қатынастардың тұрақтануына кері әсер ететін әрекеттерден тартыну жөнінде тапсырма берген.
Бұрынғы президент Джо Байденнің ұлттық қауіпсіздік жөніндегі бұрынғы кеңесшісі Джейк Салливан FT басылымына берген сұхбатында Salt Typhoon шпиондық операциясының ауқымы өте кең екенін айтқан. Оның сөзінше, Қытайдың барлау қызметі америкалық жоғары лауазымды тұлғалардың байланыс құралдарына қол жеткізіп, кез келген телекоммуникациялық желіге ене алатын мүмкіндікке ие болған.
FT-тің бір дереккөзі атап өткендей, АҚШ үкіметі мен телекоммуникациялық компаниялар бұл кибершабуылдарға қарсы тұруда айтарлықтай нәтижеге қол жеткізе алмаған.
Бейжің тарапы өз кезегінде Қытайдың Мемлекеттік қауіпсіздік министрлігінің АҚШ-тың телекоммуникациялық жүйелеріне хакерлік шабуыл жасағаны туралы айыптауларды жоққа шығарды.
