Вашингтон, 26 шілде. ИНТЕРФАКС. АҚШ-тың бірқатар демократ-сенаторлары Президент Дональд Трамп әкімшілігіне үндеу жасап, Израиль Премьер-министрі Биньямин Нетаньяхуға ХАМАС ұйымымен атысты тоқтату жөніндегі келісімге қол жеткізу мақсатында ықпал етуді сұрады. Бұл туралы сенаторлар тобы жария еткен ресми мәлімдемеде айтылды.
«Біз Трамп әкімшілігін Премьер-министр Нетаньяхуға ықпал ету үшін өзінің елеулі саяси тетіктерін пайдалануға шақырамыз», – делінген үндеуде.
Сенаторлардың пікірінше, атысты тоқтату туралы келісім кепілге алынған адамдарды тез арада босатуға мүмкіндік береді. Сонымен қатар, олар Израиль үкіметінен гуманитарлық көмекті арттыруды және оның тиімді әрі әділ бөлінуін халықаралық ұйымдардың бақылауымен қамтамасыз етуді талап етті.
Мәлімдемеде Газаға арналған Гуманитарлық қорды жабу және БҰҰ жетекшілігіндегі бұрыннан бар гуманитарлық үйлестіру механизмдерін қайта жандандыру қажеттігі де атап өтілген.
Сенаторлар қақтығыстан кейінгі кезеңге арналған кешенді жоспар әзірлеуді ұсынады. Бұл жоспарға сәйкес ХАМАС аймақтағы билікті сақтамауы тиіс, Израиль Батыс жағалауды аннексиялаудан бас тартып, аймақтық интеграция үдерісін жалғастыруы қажет. Сонымен қатар, реформаланған Палестина әкімшілігіне қажетті өкілеттіктер беру көзделуі тиіс.
Аталған үндеуге Сенат мүшелері Джек Рид, Дик Дурбин, Джинн Шейхин, Марк Уорнер, Крис Кунс және Брайан Шац қол қойған.
