Мәскеу. 9 шілде. ИНТЕРФАКС – АҚШ-та 2026 жылғы маусымда қайталама тұрғын үй нарығындағы сатылым өткен аймен салыстырғанда 2,4%-ға азайып, жылдық есеппен 4,09 млн үйді құрады. Бұл туралы АҚШ Ұлттық риелторлар қауымдастығының (NAR) есебінде айтылған.
Нақтыланған мәліметке сәйкес, мамыр айында сатылған үйлер саны бұрын хабарланған 4,17 млн емес, 4,19 млн болған.
Trading Economics сауалнамасына қатысқан сарапшылар маусымда көрсеткіш 4,2 млн үйге дейін өседі деп болжаған еді.
Маусым айында тұрғын үйдің медианалық бағасы өткен жылдың сәйкес кезеңімен салыстырғанда 1,8%-ға өсіп, 440,6 мың АҚШ долларына жетті. Осылайша бұл көрсеткіш қатарынан 36-ай бойы өсім көрсетіп отыр.
Сатылымға шығарылған үйлер саны мамырмен салыстырғанда 0,6%-ға азайып, 1,56 млн-ды құрады. Қазіргі сатылым қарқыны сақталған жағдайда бұл үйлерді толық өткізуге 4,6 ай қажет болады. Мамырда бұл көрсеткіш 4,5 ай болған. Сарапшылардың пікірінше, алты айлық қор тұрғын үй нарығының теңгерімді екенін білдіреді, ал бес айдан төмен көрсеткіш нарықтағы ұсыныстың жеткіліксіздігін көрсетеді.
NAR-дың бас экономисі Лоуренс Юннің айтуынша, ай сайынғы сатылым көлемінің тұрақсыз болуы ипотекалық мөлшерлемелердің өзгеруіне байланысты, бұл сатып алушылардың тұрғын үй сатып алу шарттарына қаншалықты сезімтал екенін көрсетеді.
Сонымен бірге ол АҚШ-тағы еңбек нарығының тұрақтылығы тұрғын үй нарығын алдағы уақытта да қолдайтынына сенім білдірді.
«Тұрғын үйдің орташа бағасы тарихи ең жоғары деңгейге жетті. Дегенмен қазіргі таңда тұрғын үй өткен жылмен салыстырғанда қолжетімдірек, өйткені жалақының өсу қарқыны тұрғын үй бағасының өсуінен жоғары», – деді Лоуренс Юн.
АҚШ-та тұрғын үй сатып алу мәмілелерінің шамамен 90%-ы қайталама нарыққа тиесілі. Бұл мәмілелер статистикада сатып алу-сату рәсімі толық аяқталғаннан кейін ғана есепке алынады.
