ВАШИНГТОН. 24 шілде. INTERFAX – АҚШ Ұлттық барлау қызметінің директоры Тулси Габбард 2016 жылғы президенттік сайлауға Ресей тарапынан ықпал етуге қатысты жалған ақпараттың таралуына бұрынғы президент Барак Обама мен оның әкімшілігінің қатысы болғанын растайтын құжаттарды құпиясыздандырды. Бұл жөнінде ол Ақ үйде өткен баспасөз мәслихатында хабарлады.
«Біз жинақтаған және жария еткен материалдар экс-президент Обаманың бұл барлау есебінің әзірлену үдерісіне тікелей жетекшілік еткенін көрсетеді», – деді Габбард.
Оның айтуынша, Обама мен ұлттық қауіпсіздік жөніндегі тобы есептің шынайы емес ақпаратқа негізделгенін білгенімен, оның әзірленуіне басшылық жасаған.
Сұхбат барысында Габбард экс-президенттің әрекеттері заңдық бағаға ие болуы мүмкін екенін айтты. «Иә, мұндай әрекетті қылмыс ретінде қарастыруға болады», – деп жауап берді ол тиісті сауалға.
Ұлттық барлау директоры қазіргі таңда Ресей тарапынан 2016 жылғы сайлауға ықпал ету әрекеттеріне қатысты нақты әрі расталған деректердің жоқ екенін атап өтті. Сонымен қатар, америкалық барлау мәліметтеріне сілтеме жасаған ол Ресей тарапы Хиллари Клинтонның денсаулығына байланысты мәселелер туралы ақпаратқа ие болған болуы мүмкін екенін жеткізді. Аталған деректерде Клинтонның күшті тыныштандыратын препараттар қабылдағаны айтылған.
АҚШ-тың жетекші бұқаралық ақпарат құралдарының хабарлауынша, бұл жолы құпиясыздандырылған құжат – 2016 жылы Дональд Трамп жеңіске жеткеннен кейін Өкілдер палатасының барлау жөніндегі комитетіндегі республикашыл өкілдер дайындаған 44 беттен тұратын баяндама.
Politico басылымы Конгресстегі демократиялық партия мүшелері бұл есепті біржақты және саяси астарлы құжат ретінде бағалағанын хабарлады.
Еске салайық, шілде айының басында Тулси Габбард Ресейдің АҚШ сайлауына ықпал еткені туралы нұсқаның расталмаған және тексерілмеген деректерге негізделгенін көрсететін алғашқы материалдарды да жария еткен болатын.
