АСТАНА. 25 қараша. ИНТЕРФАКС-ҚАЗАҚСТАН – Қазақстан мен Түрікменстан арасындағы өзара сауда көлемі соңғы бес жыл ішінде төрт еседен астам өсіп, 500 миллион АҚШ долларынан асты. Бұл туралы Қазақстан Президенті Қасым-Жомарт Тоқаев Түрікменстан Президенті Сердар Бердімұхамедовтің Астанаға мемлекеттік сапары аясында кеңейтілген құрамда өткен келіссөздер барысында мәлімдеді.
«Соңғы бес жылда өзара сауда көлемі төрт еседен аса ұлғайып, жарты миллиард доллардан асты», – деді Мемлекет басшысы.
Тоқаевтың айтуынша, бүгінде Қазақстанда түрікмен капиталының қатысуымен шамамен 140 компания жұмыс істейді, ал қазақстандық инвестициялардың Түрікменстандағы көлемі $120 млн-нан асып отыр.
«Екі ел арасындағы сауда-экономикалық ынтымақтастық қарқынды дамып келеді. Сонымен қатар, мәдени-гуманитарлық саладағы байланыстар да нығая түсті. Жалпы, қазіргі серіктестік деңгейі мен мазмұны толық қанағаттанарлық. Бұл – стратегиялық ынтымақтастық. Дегенмен, біз одан әрі ілгерілеуіміз қажет», – деді Тоқаев.
Келіссөздер барысында тараптар екіжақты ынтымақтастықтың басым бағыттарын талқылады. Атап айтқанда, сауда-экономикалық, мәдени-гуманитарлық, көлік-логистикалық байланыстар бойынша мәселелер қаралды.
Сонымен қатар энергетика, өндірістік кооперация, ауыл шаруашылығы, ақпараттық технологиялар, білім және медицина салаларындағы бірлескен жобаларды жүзеге асыру мәселелері қозғалды.
Өз кезегінде Түрікменстан Президенті Сердар Бердімұхамедов Түрікменстан мен Қазақстанды Орталық Азиядағы стратегиялық әріптестер деп атады.
«Саяси-дипломатиялық салада Түрікменстан мен Қазақстан жаһандық күн тәртібіндегі өзекті мәселелер бойынша конструктивті өзара іс-қимыл жүргізуде. Бұл – бейбітшілік пен қауіпсіздікті қамтамасыз ету, энергетикалық тұрақтылықты нығайту, көлік байланысын дамыту, тұрақты даму мақсаттарына қол жеткізу және климаттың өзгеруіне қарсы күрес», – деді Бердімұхамедов.
