Иерусалим, 18 қаңтар. ИНТЕРФАКС — Катар АҚШ президенті Дональд Трамптың бастамасымен құрылып жатқан Газа бойынша бейбітшілік кеңесінің жұмысына қатысуға дайын. Бұл туралы жексенбі күні Times of Israel басылымы хабарлады.
Басылымның мәліметінше, Катар билігі АҚШ қолдау көрсететін Газа жөніндегі атқарушы кеңестегі өз өкілі Али әл-Таввади аталған органның жұмысына қатысып, Газаны тиімді басқаруға, сондай-ақ өңір тұрғындары үшін ұзақ мерзімді әрі тұрақты бейбітшілікке, тұрақтылық пен өркендеуге қол жеткізуге бағытталған халықаралық күш-жігерді қолдайтынын мәлімдеген.
Газет дерегіне сәйкес, Катар премьер-министрі Мұхаммед бин Абдельрахман Әл Тани аппараты жанындағы стратегиялық мәселелер жөніндегі министр Али әл-Таввади Катардың делдалдық бастамаларындағы негізгі тұлғалардың бірі саналады және Израильмен, ХАМАС-пен әрі серіктестермен тұрақты диалог жүргізіп отырған тиімді араағайын ретінде танылған. Сонымен қатар басылым оның АҚШ президенті Дональд Трамп ұсынған Газаға қатысты 20 тармақтан тұратын жоспарды әзірлеуге Катардың қосқан үлесінде шешуші рөл атқарғанын атап өтеді.
Бұған дейін Дональд Трамп Газа бойынша бейбітшілік кеңесінің құрылғанын хабарлаған болатын. Ақ үй сенбі күні таратқан ақпаратқа сәйкес, кеңес құрамына АҚШ мемлекеттік хатшысы Марко Рубио, Трамптың арнайы өкілі Стив Уиткофф, АҚШ президентінің күйеу баласы әрі инвестор Джаред Кушнер, Ұлыбританияның бұрынғы премьер-министрі Тони Блэр, Дүниежүзілік банк басшысы Ажай Банга және АҚШ ұлттық қауіпсіздік жөніндегі кеңесшісінің орынбасары Роберт Гэбриел кірген.
