Анталья. 12 қараша. ИНТЕРФАКС – Батыс елдерінің санкциялары Ресейде климаттық реттеу жөніндегі бастамаларды жүзеге асыруға кедергі келтіріп отыр. Соған қарамастан, ел бұл бағыттағы жұмысын жүйелі түрде жалғастырып келеді. Бұл туралы Ресейдің экономикалық даму министрі Максим Решетников COP31 конференциясы аясында журналистерге мәлімдеді.
«Әрине, Батыс санкциялары белгілі бір кедергілер туғызып, климат саласындағы міндеттерді тиімді жүзеге асыруға кері әсерін тигізіп отыр. Дегенмен соңғы алты жыл бойы біз бұл бағыттағы жұмысымызды тоқтатқан жоқпыз. Өз заңнамамызды қалыптастырып, есептілік жүйесін енгіздік. Ерікті климаттық жобаларды жүзеге асырып жатырмыз. Өнімнің көміртегі ізіне қатысты жұмыстарды дамытып, өңірлік эксперименттер негізінде шығарындылар квоталарының сауда жүйесін жетілдірудеміз. (…) Технологиялар мен қаржыландыруға қатысты шектеулер бар екені түсінікті. Алайда бұларды нақты шектеулерден гөрі осы бағыттағы ілгерілеуді баяулататын факторлар деуге болады», – деді ол.
Министр Ресейдің климаттық реттеу мәселелері бойынша БРИКС және Еуразиялық экономикалық одақ (ЕАЭО) елдерімен белсенді ынтымақтастық орнатып отырғанын да атап өтті.
БҰҰ-ның Климаттың өзгеруі жөніндегі конференциясы (COP31) 9–20 қараша аралығында Антальяда өтіп жатыр. 2026 жылғы конференцияны өткізу құқығына Түркиямен қатар Аустралия да үміткер болған. Ортақ келісімге келу үшін қабылдаушы тараптың міндеттері екі ел арасында бөлінді. Атап айтқанда, келіссөздер жүргізу өкілеттігі Аустралияға берілді.
Дәстүр бойынша конференцияда парниктік газдар шығарындыларын азайту, климаттың өзгеру салдарына бейімделу, әділ өтпелі кезеңді қамтамасыз ету, көміртегі шығарындылары төмен технологияларды дамыту және климаттық қаржыландыру мәселелері басты назарда.
