Астана. 3 шілде. ИНТЕРФАКС-ҚАЗАҚСТАН – Қазақстан премьер-министрі Олжас Бектенов өңір әкімдіктеріне болжанып отырған мол жауын-шашынға байланысты эвакуациялық пункттерді, қажетті көлікті дайындауды және халықты эвакуациялау жоспарларын жаңартуды тапсырды. Бұл туралы үкіметтің баспасөз қызметі хабарлады.
«Жергілікті атқарушы органдардың күштері мен құралдарының әзірлігін қамтамасыз ету, оның ішінде эвакуациялық пункттерді, қажетті көлікті дайындау және халықты эвакуациялау жағдайларына арналған іс-қимыл жоспарларын жаңарту қажет», – делінген гидрологиялық ахуалға арналған кеңесте премьер-министр берген тапсырмаларда.
«Қазгидромет» мәліметінше, алдағы күндері Қазақстанның басым бөлігінде мол жауын-шашын күтіледі. Ең қатты жауын Алматы, Жамбыл және Жетісу облыстарында жауады деп болжанып отыр.
Сондай-ақ Бектенов әкімдіктерге Төтенше жағдайлар министрлігімен бірлесіп, халық пен инфрақұрылым нысандарының қауіпсіздігін қамтамасыз ету шараларын қабылдауды тапсырды. Сел қаупі жоғары өңірлердің әкімдіктеріне мореналық көлдердің жай-күйін ерекше бақылауда ұстап, оларды уақытылы босатуды және селден қорғайтын гидротехникалық құрылыстардың дайындығын тексеруді жүктеді.
Экология министрлігіне гидрологиялық бекеттер мен ауа райы болжамына күн сайын мониторинг жүргізіп, дауылды ескертулерді мүдделі мемлекеттік органдарға жедел жеткізуді қамтамасыз ету тапсырылды.
Су ресурстары министрлігіне гидротехникалық құрылыстардың жай-күйін бақылау, сондай-ақ су шығыны мен трансшекаралық өзендердегі жағдай туралы тұрақты ақпарат алмасуды ұйымдастыру міндеттелді.
Төтенше жағдайлар министрлігіне қолайсыз гидрологиялық ахуал жағдайында халықтың қауіпсіздігін қамтамасыз етуге бағытталған алдын алу шараларын жалғастыру тапсырылды.
