Лондон. 18 желтоқсан. ИНТЕРФАКС – Бельгия Украинаға «репарациялық несие» беру үшін Ресейдің бұғатталған активтерін пайдалану жағдайында ұсынылған кепілдіктерді жеткіліксіз деп есептейді. Бұл туралы Financial Times газеті хабарлады.
Басылымның Еуроодақтағы жоғары лауазымды дереккөздерге сілтеме жасап жазуынша, құқықтық кепілдіктер бойынша белгілі бір ілгерілеу болғанымен, Ресейге қаражатты қайтару қажеттілігі туындаған жағдайда жедел қолма-қол ақшаға қол жеткізуді қамтамасыз ететін өтімділік тетігі, сондай-ақ Ресей аумағындағы Euroclear активтерін қорғау мәселелері әлі де шешілмей отыр.
Бұған дейін ЕО шенеуніктері Бельгия премьер-министрі Барт де Вевермен және елдің өзге де өкілдерімен Ресейдің бұғатталған активтерін Украинаға арналған репарациялық несиеге пайдалану мәселесін талқылау үшін кездескен.
Дереккөздердің айтуынша, де Вевер бұғатталған активтерді пайдаланудың орнына ЕО-ның ортақ бюджетінің кепілдігімен мүше елдердің бірлескен қарыз алу тетігін қолдауды ұсынған.
Алайда Еурокомиссия мұндай шешім үшін ЕО елдерінің бірауыздан келісімі қажет екенін, ал Венгрия бұл бастамаға вето қоятынын алдын ала мәлімдегенін атап өтті.
«Негізгі текетірес ортақ қарызды қолдайтындар мен оған қарсы елдер – Германия, Нидерланды және басқа да “үнемшіл мемлекеттер” арасында болып отыр», – деді ЕО-ның жоғары лауазымды дипломаты.
Бейсенбі күні басталған Еуроодақ саммитінде Украинаға қаржылай қолдау көрсету, оның ішінде Ресейдің бұғатталған активтерін пайдалану мәселесі де қарастырылуда.
Бұған дейін Еурокомиссия төрайымы Урсула фон дер Ляйен саммитте Украинаны қаржыландырудың екі нұсқасы талқыланатынын айтқан: ЕО бюджеті есебінен немесе Ресейдің бұғатталған активтерін пайдалана отырып «репарациялық несие» беру арқылы.
«Мен қаражат бөлуге қатысты екі ұсыныс енгіздім. Біріншісі – ЕО бюджеті арқылы қаржыландыру, екіншісі – репарациялық несие», – деді ол саммит қарсаңында журналистерге.
Бельгияның қосымша кепілдіктерді талап етіп отырғанына қатысты фон дер Ляйен: «Мен Бельгияның алаңдаушылығын ескеруге бағытталған ұстанымын толық қолдаймын», – деп мәлімдеді.
Брюссельде орналасқан Euroclear қаржы депозитарийінің басқаруында Ресейдің ЕО аумағында бұғатталған 210 млрд еуроға жуық активінің басым бөлігі сақтаулы. Еурокомиссия осы қаражатты Украинаны қолдау үшін пайдалануды ұсынып отыр. Бұл бастамаға Бельгиядан бөлек Венгрия, Словакия, Италия, Болгария, Мальта және Чехия да қарсы. Аталған елдердің пікірінше, Ресей активтерін тәркілеу елеулі құқықтық салдарға әкеліп, ЕО қаржы жүйесіне деген сенімді әлсіретуі мүмкін.
Бұған дейін Еурокомиссия ЕО аумағында бұғатталған Ресей активтерінің 210 млрд еуросын Украинаға берілетін несиені қаржыландыруға пайдалануды ұсынған. Алғашқы кезеңде екі жыл ішінде 90 млрд еуро бөлу көзделіп отыр.
