Астана. 18 желтоқсан. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күні өткен пленарлық отырыста екі оқылымда қарап, «Коммуналдық меншікте тұрған энергия өндіруші ұйымдарды салық салу мәселелері бойынша “Салықтар және бюджетке төленетін басқа да міндетті төлемдер туралы” кодекске (Салық кодексіне) толықтырулар енгізу туралы» заңды мақұлдады.
Мәжілістің қаржы және бюджет комитетінің қорытындысында атап өтілгендей, құжат коммуналдық меншікте тұрған әрі бір мезгілде электр энергиясын, суды (дистиллятты) және жылу энергиясын өндірумен айналысатын энергия өндіруші ұйымдардың мемлекеттік субсидияларды толық көлемде игеруін қамтамасыз ету мақсатында депутаттар тарапынан әзірленген.
Түзетулерге сәйкес, Үкімет қорынан және жергілікті атқарушы органдардан бөлінген субсидиялар, сондай-ақ гранттар мен өзге де өтеусіз көмек коммуналдық меншікте тұрған, акцияларының 100 пайызы мемлекетке тиесілі және электр энергиясын, суды (дистиллятты) әрі жылу энергиясын бір мезгілде өндіретін энергия өндіруші ұйымдар үшін салық салу мақсатында табыс ретінде қаралмайды.
Сонымен қатар аталған субсидиялар, гранттар немесе өзге де өтеусіз көмек есебінен жұмсалған шығындар шегерімге жатқызылмайтыны туралы норма енгізілді. Бұл талап Үкімет резервінен және жергілікті атқарушы органдардан бөлінген қаражатқа қатысты, сондай-ақ акцияларының 100 пайызы мемлекетке тиесілі, коммуналдық меншікте тұрған энергия өндіруші ұйымдарға қолданылады.
Қабылданған заң Мемлекет басшысының қол қоюына жіберіледі.
