Брюссель, 16 шілде – Бельгия шілде айының соңында Литва аумағына шамамен 200 әскери қызметкерін орналастыруды жоспарлап отыр. Бұлтуралы елдің қорғаныс министрі Тео Франкен Федералдық парламенттің Өкілдер палатасында мәлімдеді.
Министрдің айтуынша, миссия НАТО-ның шығыс қапталын қорғау жөніндегі Forward Land Forces операциясы аясында жүзеге асады. Қорғаныс бастамасы«Ресей тарапынан төнетін қауіп-қатерге қарсы тұру» мақсатымен іске қосылған.
RTBF телеарнасының хабарлауынша, миссияны жүзеге асыру туралы шешімді Бельгия министрлер кеңесі жұма күні ресми түрде бекітеді депкүтілуде.
Бельгиялық әскери бөлімше Литвада 2026 жылғы 31 қаңтарға дейін қызмет етеді. Құрамында шамамен 100 адамнан тұратын барлау эскадроны, 70 әскери қызметші бар артиллериялық топ, сондай-ақ шамамен 10 штаб офицері мен қолдау көрсететін бөлімшеден 10-ға жуық маман болады. Олар логистика, медициналық қызмет пен әскери полицияны қамтамасыз етеді.
«Бұл — Солтүстік Атлантикалық одақ аясындағы жауапкершілікке дайын екенімізді және әріптестерімізбен саяси-әскери ынтымақтастығымызды айқын көрсететін шешім», — деді Тео Франкен.
