Астана. 30 қыркүйек. ИНТЕРФАКС-ҚАЗАҚСТАН – Қазақстан Республикасының Президенті Қасым-Жомарт Тоқаевтың айтуынша, елдегі теміржол саласы цифрлық шешімдер мен жасанды интеллект технологияларын енгізу арқылы белсенді дамитын болады.
«Қазақстан солтүстікті оңтүстікпен, батысты шығыспен байланыстырып отыр. Еліміздің аумағы арқылы әлемдегі ең ірі сауда нарықтарына апаратын 5 теміржол дәлізі өтеді. Алдағы уақытта 5 мың шақырым теміржол салынып, 11 мың шақырымы жөндеуден өтеді. Қазіргі таңда Мойынты – Қызылжар теміржол желісінің құрылысы жүргізілуде. Сонымен қатар Қызылжар станциясынан Ақтау портына дейінгі аралықты жаңғырту жоспарлануда. Бұл бағыт Транскаспий халықаралық көлік дәлізінің маңызды бөлігі болып саналады», – деді Мемлекет басшысы Достық – Мойынты теміржолының екінші желісінің іске қосылу салтанатында сөйлеген сөзінде.
Президенттің айтуынша, болашақта бұл салаға цифрландыру мен жасанды интеллект технологиялары белсенді енгізіліп, оны ел экономикасының алдыңғы қатарлы бағыттарының біріне айналдыру көзделуде.
Мемлекет басшысы соңғы он жылда елдің көлік-логистика инфрақұрылымына шамамен 35 млрд АҚШ доллары көлемінде инвестиция тартылғанын атап өтті. Оның пікірінше, қабылданып жатқан шаралар Еуропа мен Азия арасындағы байланысты нығайтып, Трансқазақстандық теміржол бағыты мен Орта дәліздің дамуына ықпал етеді.
«Бәсекеге қабілеттілікті сақтау үшін мемлекет ең алдымен экономиканы нығайтуға баса мән беруі тиіс. Бұл ретте көлік-логистика саласының орны ерекше. Сондықтан Қазақстанның транзиттік әлеуетін арттыру – негізгі басымдықтардың бірі. Теміржол саласының алдында ауқымды міндеттер тұр», – деп түйіндеді Қасым-Жомарт Тоқаев.
