Астана. 30 қыркүйек. ИНТЕРФАКС-ҚАЗАҚСТАН – Мемлекет басшысы Қасым-Жомарт Тоқаев Достық – Мойынты теміржол желісінің екінші бағытының ресми іске қосылу рәсіміне қатысты, деп хабарлады Ақорданың баспасөз қызметі.
«Біз Достық – Мойынты теміржолының екінші желісінің ресми ашылуының куәсі болып отырмыз. Бұл – еліміздің көлік-логистика жүйесін дамыту мен оның тиімділігін арттыруға серпін беретін аса маңызды инфрақұрылымдық жоба», – деді Президент өз сөзінде.
Мемлекет басшысы 35 жыл бұрын Достық – Алашанькоу жобасы іске қосылғанын еске салды. «Қазақстан мен Қытай теміржолдарының тоғысуы еліміз үшін тарихи оқиға болды», – деді Тоқаев.
Президент Қытайдың Қазақстан үшін – тұрақты көрші әрі сенімді стратегиялық әріптес екенін атап өтті. Екі ел бір-бірін үнемі қолдап келеді. Мемлекеттер арасындағы қарым-қатынас өзара сенім мен достыққа негізделген.
«Бізді ортақ болашаққа деген көзқарас біріктіреді. Жан-жақты ынтымақтастық нығайып келеді. Осы тұрғыда «Бір белдеу, бір жол» жаһандық бастамасының маңызы ерекше. 2013 жылы бұл бастаманы Қытай Төрағасы Си Цзиньпин алғаш рет Қазақстанда жариялаған болатын. Қазақстан бұл жобаны жан-жақты қолдайды және оны жүзеге асыруға белсенді қатысуда. Бұл – еліміздің ұлттық мүдделеріне толық сәйкес келеді. Соның жарқын дәлелі – Достық – Мойынты теміржолының екінші желісі», – деді Мемлекет басшысы.
Қасым-Жомарт Тоқаев жобаның мерзімінен бұрын аяқталуына отандық жұмысшылардың қажырлы еңбегі себеп болғанын атап өтті. Жаңа желінің іске қосылуы жүк тасымалы көлемін бес есеге арттырып, экспорттық өнімдерді жеткізу мерзімін қысқартуға мүмкіндік береді.
Еске сала кетейік, Достық (Алматы облысы, Қытай шекарасына жақын) – Мойынты (Қарағанды облысы, Шет ауданы) бағытындағы ұзындығы 836 шақырымдық теміржол желісінің құрылысы 2022 жылдың қараша айында басталған болатын.
