Сеул. 29 желтоқсан. ИНТЕРФАКС – Оңтүстік Кореяның интернет-ритейлері Coupang деректердің жаппай таралуына байланысты зардап шеккен 33,7 миллион клиентке жалпы сомасы 1,69 трлн вонды (шамамен 1,2 млрд АҚШ доллары) өтемақы ретінде төлейтін болды. Бұл туралы компанияның баспасөз хабарламасында айтылған.
Компания әр клиентке Coupang платформаларында пайдалануға болатын 50 мың вондық ваучер береді. Сонымен қатар, мәліметтер тарағаннан кейін жеке аккаунтын жапқан бұрынғы клиенттер де осы ваучерді алуға құқылы.
Coupang негізін қалаушы Ким Бом және бас директордың міндетін атқарушы Гарольд Роджерс зардап шеккен пайдаланушылардан тағы да ресми кешірім сұрады.
Бұл оқиға компанияның бас директоры Пак Дэ Джунның осы айдың басында қызметінен кетуіне себеп болды. Хакерлік шабуыл Coupang жүйесіне осы жылдың маусым айында жасалған, алайда қауіп тек қараша айында ғана анықталған.
Электрондық пошта мекенжайлары, жеткізу мекенжайлары және телефон нөмірлері – шамамен Оңтүстік Корея халқының үштен екі бөлігінің деректері қауіпке ұшыраған. Компания төлем мәліметтері бұзылмағанын және клиенттердің қаржылық ақпараты сақталғанын ресми түрде мәлімдеді.
Coupang — елдегі ең танымал онлайн сауда платформаларының бірі.
Оңтүстік Корея Парламенті осы жағдайға байланысты алдағы аптада сейсенбі және сәрсенбі күндері тыңдау өткізуді жоспарлап отыр.
