Вашингтон. 22 желтоқсан. ИНТЕРФАКС – Данияның Сыртқы істер министрлігі АҚШ президенті Дональд Трамп Луизиана штатының губернаторы Джефф Лэндриді Гренландия жөніндегі арнайы өкіл етіп тағайындағаннан кейін, елдің аумақтық тұтастығын сақтаудың маңыздылығын атап өтті. Бұл туралы дүйсенбі күні Associated Press хабарлады.
«АҚШ-ты қоса алғанда, барлық тараптар Дания Корольдігінің аумақтық тұтастығына құрметпен қарауы тиіс екенін талап етеміз», – деді Данияның сыртқы істер министрі Ларс Лекке Расмуссен.
Оның айтуынша, Гренландия бойынша америкалық арнайы өкілдің тағайындалуы АҚШ-тың аралға деген тұрақты қызығушылығының бар екенін көрсетеді.
Дат ведомствосының басшысы бұл мәселені талқылау үшін АҚШ өкілдерін Сыртқы істер министрлігіне шақыруды жоспарлап отырғанын мәлімдеді.
Бұған дейін Дональд Трамп Луизиана губернаторы Джефф Лэндридің Гренландия жөніндегі арнайы өкіл қызметін атқаратынын жариялаған. АҚШ президенті оның «аралдың АҚШ ұлттық қауіпсіздігі үшін маңызын жақсы түсінетінін» атап өткен. «Ол еліміздің, одақтастарымыздың және бүкіл әлемнің қауіпсіздігі мен тұрақтылығы жолында АҚШ мүдделерін ілгерілетеді», – деп жазды Трамп Truth Social әлеуметтік желісінде.
Джефф Лэндри өз кезегінде бұл қызметке тағайындалуын «үлкен құрмет» деп атап, Гренландияның АҚШ құрамына қосылуына ықпал етуге дайын екенін білдірді. Сонымен қатар ол Луизиана штатының губернаторы қызметін қатар атқара береді.
Гренландия – Данияның өзін-өзі басқару құқығы бар аумағы.
Осы жылдың басында АҚШ президенті Дональд Трамп Конгреске жолдауында Гренландияға қатысты аумақтық талаптардан бас тартпайтынын мәлімдеген болатын. Ол АҚШ арал халқы өз еркімен келіссе, Гренландияны құрамына қабылдауға дайын екенін айтқан. Сонымен бірге аралды күш қолдану арқылы алу мүмкіндігін де жоққа шығармады. Гренландия аумағында АҚШ-тың «Питуффик» атты ғарыш базасы орналасқан.
Гренландия Арктика аймағының қауіпсіздігін қамтамасыз етуде маңызды орын алады, өңір арқылы өтетін теңіз жолдарының бастапқы нүктесі болып саналады, сондай-ақ сирек кездесетін металдар мен өзге де табиғи ресурстарға бай. Батыс басылымдарының мәліметінше, аралда графит, мыс, мырыш, алтын, алмас, темір кені, титан, ванадий және уран қорлары бар, алайда геологиялық барлау жұмыстары толық көлемде жүргізілмеген.
