Лондон. 20 шілде. ИНТЕРФАКС – Лейбористік партияның жаңа жетекшісі Энди Бернем дүйсенбі күні Ұлыбританияның премьер-министрі қызметіне ресми кірісті. Бұл туралы Sky News телеарнасы Букингем сарайына сілтеме жасап хабарлады.
«Ұлыбритания королі ІІІ Чарльз парламент депутаты Энди Бернемді қабылдап, оған жаңа үкімет құруды тапсырды», – делінген британ монархының резиденциясы таратқан мәлімдемеде.
«Бернем корольдің ұсынысын қабылдап, премьер-министр әрі Қазынашылықтың бірінші лорды қызметіне тағайындалуға келісті», – деп көрсетілген мәлімдемеде.
Бұл қызметте Бернем дүйсенбі күні отставкаға кеткен Кир Стармердің орнын басты. Кейінірек оның халық алдында сөз сөйлеуі мүмкін.
Бернем жұма күні ресми түрде Лейбористік партияның жаңа көшбасшысы болып сайланып, бұл қызметте Кир Стармерді алмастырған еді.
Маусым айында Стармер партия жетекшісі және тиісінше премьер-министр қызметінен кететінін мәлімдеген болатын. Бұған партияластарының қысымы себеп болды. Олар Англиядағы жергілікті кеңестерге, сондай-ақ Уэльс пен Шотландия парламенттеріне өткен сайлаудағы сәтсіз нәтижелерге байланысты Стармердің отставкасын талап еткен.
Осыдан кейін Энди Бернем партия басшылығы үшін күрестегі жалғыз үміткер болып қалып, автоматты түрде жеңімпаз атанды.
Бернем өз тұсында Лондонның Украинаға қатысты ұстанымы өзгермейтінін және Ұлыбритания Киевті қолдауды жалғастыратынын айтты. Сонымен қатар ол партиясының Газа секторындағы қақтығысқа қатысты ұстанымы үшін кешірім сұрап, Израиль билігіне қысымды күшейту қажет екенін мәлімдеді.
«Газада әскери қылмыстар жасалған болуы мүмкін екенін дәлелдейтін айғақтар бар», – деді ол.
Энди Бернем 1970 жылғы 7 қаңтарда Ливерпуль қаласының маңындағы Эйнтри елді мекенінде дүниеге келген. Әкесі инженер, ал анасы жалпы тәжірибелік дәрігердің тіркеу бөлімінде жұмыс істеген. Ол 15 жасында-ақ ата-анасының ықпалымен Лейбористік партия қатарына қосылған.
Бернем Кембридж университетінің Фицуильям колледжін бітіріп, ағылшын филологиясын оқыды. Оқуын аяқтаған соң Лондонға көшіп, біраз уақыт Tank World журналында жұмыс істеді.
Кейін депутат Тесса Джоуэллдің көмекшісі болып қызмет атқарып, парламентте бірнеше лауазымда еңбек етті. 2001 жылы Қауымдар палатасына депутат болып сайланып, онда 2017 жылға дейін жұмыс істеді.
Осы кезеңде ол Тони Блэр үкіметінде бірнеше қызмет атқарды. Кейін Гордон Браун үкіметінде Мәдениет, бұқаралық ақпарат құралдары және спорт министрі, сондай-ақ Денсаулық сақтау министрі болды.
2017 жылы Бернем парламенттен кетіп, Манчестер қаласының мэрі болып сайланды. Бұл қызметте ол қаланы абаттандыру мен инфрақұрылымды дамытудағы жетістіктерімен танылып, британдық БАҚ-та «Солтүстіктің королі» деген бейресми лақап атқа ие болды.
Ол Манчестер мэрі қызметін 2026 жылға дейін атқарып, парламентке қайта оралу үшін ғана бұл лауазымнан кетті.
Энди Бернем 2000 жылы Мари-Франс ван Хилге үйленген. Ерлі-зайыптылардың бір ұлы және екі қызы бар.
