Кабул. 7 қазан. ИНТЕРФАКС – Еуропалық Одақ Ауғанстанда есірткіге тәуелді азаматтарды емдеу, елге оралған босқындар үшін тұрғын үй салу және оларды жұмыспен қамту мәселелерінде көмек көрсетуге дайын екенін мәлімдеді.
Ауғанстан Премьер-министрінің орынбасары Абдул Салам Ханафи ЕО-ның Ауғанстандағы уақытша істер жөніндегі сенімді өкілі Вероника Боскович Похармен және оны ілестіріп келген делегациямен кездесті. Бұл туралы Ауғанстан үкіметі баспасөз қызметі басшысының орынбасары Хамдулла Фитрат әлеуметтік желілерде хабарлады.
Оның айтуынша, Боскович Ауғанстан билігінің жетекшілігімен түрлі салаларда бірқатар оң өзгерістер орын алғанын атап өткен. Сондай-ақ ол Еуропалық Одақтың жер сілкінісі салдарынан зардап шеккен Кунар провинциясындағы тұрғындарға және елге оралған босқындарға көрсетілетін көмекке дайын екенін айтып, Ауғанстанда есірткіге тәуелділікті емдеу саласында да ынтымақтастық орнатуға ниетті екенін жеткізген.
Боскович Ауғанстан үкіметінің босқындарды елге қайтару процесін басқаруын жоғары бағалады. Сонымен қатар ЕО оралған азаматтарға арнап тұрғын үй салу мен оларды жұмыспен қамту бойынша жобаларға қатысуға дайын екенін атап өтті.
Өз кезегінде Абдул Салам Ханафи Еуропалық Одақтың босқындарға және табиғи апаттардан зардап шеккен азаматтарға көрсеткен қолдауы үшін алғыс білдірді.
Сондай-ақ вице-премьер климаттың өзгеруі, табиғи апаттар мен босқындардың елге оралуы мәселелерін көтеріп, өзге мемлекеттерді осы саладағы халықаралық міндеттемелерін орындауға шақырды.
