Хельсинки. 7 қаңтар. ИНТЕРФАКС – Финляндияның Кеден қызметі ұсталған Fitburg құрғақ жүк кемесіне қатысты елдің аумақтық суларына санкция салынған болат өнімін әкелу жөніндегі күдікті алып тастады.
«Fitburg кемесінің бортындағы болат өнімдерінің жүгі Ресейге қарсы санкциялар аясында шектеуге жататын өнім ретінде жіктеледі. Алайда кеден бұл іс бойынша қылмыстық тергеу бастамайды», – делінген ведомствоның сәрсенбі күні жарияланған баспасөз хабарламасында.
Фин кеденінің мәліметінше, жүргізілген сұраулар нәтижесінде кеменің Финляндия аумақтық суларына фин билігінің сұрауы бойынша кіргені анықталған. Осыған байланысты экипаждың болат өнімін әдейі Финляндияның аумақтық суларына әкеліп, санкциялық заңнаманы бұзды деп санауға негіз жоқ.
Ведомство сондай-ақ болат өнімдері Финляндия аумағынан тыс жерге шығарылған жағдайда, жүктің ұсталуын тоқтататынын хабарлады.
Хабарламада алдын ала тексерудің мақсаты Fitburg экипажының санкцияға жататын болат өнімін елдің аумақтық суларына әкелу кезінде ауырлататын мән-жайлар болған-болмағанын анықтау болғаны көрсетілген.
Кеме Еуропалық одақ санкцияларының тізіміне кірмейді, алайда оның бортында 9 мың тонна құрылымдық болат бар.
Сонымен бірге сәрсенбі күні Финляндияның Көлік және байланыс агенттігі Traficom Fitburg кемесінде елеулі техникалық кемшіліктер анықталмағанын және олар жойылғаннан кейін кеменің сапарын жалғастыра алатынын мәлімдеді.
Еске салайық, 31 желтоқсанда Финляндия полициясы Санкт-Петербургтен Израильдің Хайфа портына бет алған, Сент-Винсент және Гренадиндер туы астында жүзген Fitburg кемесін ұстаған болатын. Оған Хельсинки мен Таллинді Фин шығанағының түбімен байланыстыратын Elisa суасты телекоммуникациялық кабелін зақымдады деген күдік келтірілген.
Оқиға орнында жүргізілген суасты зерттеулері барысында бірнеше шақырымға созылған кеме якорының ізі анықталған. Алдын ала болжам бойынша, кабельге зақым сол якорь арқылы келтірілген.
Кеме экипажы 14 адамнан тұрады, олардың қатарында Ресей, Грузия, Әзербайжан және Қазақстан азаматтары бар. Хельсинки округтік соты Армения азаматын қамауға алуға санкция берген, алайда оның аты-жөні мен кемедегі қызметі жария етілмейді. Экипаждың тағы үш мүшесіне елден шығуға тыйым салынған.
Қазіргі кезеңде полиция бұл оқиғаны аса ірі көлемде залал келтіру, аса ірі көлемде қасақана залал келтіруге оқталу және ауырлататын жағдайларда телекоммуникациялық жүйелердің жұмысына кедергі келтіру баптары бойынша тергеп жатыр.
