Брюссель. 25 тамыз. ИНТЕРФАКС – Германияның вице-канцлері және Қаржы министрі Ларс Клингбайль дүйсенбі күні Украинаға жарияланбаған ресми сапармен барды. Бұл туралы Батыс БАҚ-тары хабарлады.
«Біз Украинаға қолдау көрсетуде әлем бойынша екінші, ал Еуропадағы ең ірі серіктес ел болып қала береміз. Украина Германияға арқа сүйей алады», – деп мәлімдеді Ларс Клингбайль сапар барысында.
Сонымен қатар ол Ресей билігін Украинадағы бейбіт процесті қолдайтын ниетін көрсетуге шақырды. Министрдің айтуынша, келіссөздерге Киев міндетті түрде қатысуы керек және атысты тоқтату мен Украинаға сенімді қауіпсіздік кепілдіктерін қамтамасыз ету қажет.
БАҚ мәліметінше, Германия Қаржы министрлігінің ақпаратына сәйкес, 2022 жылғы ақпан айынан бері Германия Украинаға жалпы сомасы 50,5 миллиард еуро көлемінде көмек көрсеткен.
Бұған дейін Германияның сыртқы істер министрі Йоханн Вадефуль Украина үшін қауіпсіздік кепілдіктерін қамтамасыз етуге АҚШ пен Еуропадан тыс өзге де мемлекеттерді тарту қажет екенін айтқан болатын. Оның сөзінше, мұндай кепілдіктер НАТО мүшелігімен тең дәрежеде болуы тиіс.
