Гонконг. 27 қараша. ИНТЕРФАКС – Сәрсенбіден бері Гонконгтегі тұрғын үй кешенінде болған өрт салдарынан кемінде 44 адам көз жұмды, тағы кемінде 71 адам түрлі дәрежедегі жарақат алған. Бұл туралы бейсенбі күні Associated Press агенттігі хабарлады.
Қайтыс болғандар арасында бір өрт сөндіруші бар. Зардап шеккен шамамен 70 адамның 45-і ауруханаларда ауыр халде жатыр. The Guardian деректеріне сәйкес, 280-ге жуық адам хабар-ошарсыз жоғалғандар санатында.
Сәрсенбі күні жарияланған алғашқы мәліметтер бойынша 36 адамның қаза тапқаны хабарланған болатын.
Бейсенбі таңында өрттің таралуы бақылауға алынды, алайда толықтай сөндірілген жоқ. Өрт сөндірушілердің мәліметінше, өртті толық сөндіру операциясы бейсенбі кешіне дейін жалғасуы мүмкін.
Оқиға орнында 28 құтқару тобы жұмыс істеуде.
Бейсенбі таңында құрылыс компаниясының үш қызметкері – екі басшы және техникалық кеңесші – ұсталды. Оларға абайсызда адам өліміне әкелген әрекет жасады деген айып тағылып отыр. Полиция олардың нақты қай компанияда жұмыс істегенін хабарлаған жоқ.
Бұған дейін Associated Press агенттігі өрт шыққан тұрғын үй кешенін жаңарту жұмыстарын Prestige Construction & Engineering Co. компаниясы жүргізгенін мәлімдеген болатын.
Билік өкілдері биік ғимараттардың сыртқы қабырғаларында қолданылған кейбір құрылыс материалдарының өрт қауіпсіздігі стандарттарына сәйкес келмегенін, соның салдарынан өрттің қалыптан тыс жылдам таралғанын жоққа шығармайды.
БАҚ бұл өртті соңғы ондаған жылдағы Гонконгтегі ең ауыр қайғылы оқиға деп бағалап отыр.
Өрт сәрсенбі күні Тайпоу ауданындағы Wang Fuk Court тұрғын үй кешенінде басталды. Алдымен кешеннің сыртқы бөлігінде орналасқан бамбуктан жасалған құрылыс ормалары мен қорғаныс торлары тұтанған. Араға көп уақыт салмай өрт басқа да ғимараттарға таралып, фотосуреттерде биік жалын мен қою түтіннің көрінгені хабарланды.
Ресми ақпаратқа сәйкес, тұрғын үй кешенінде шамамен 2 мың пәтер орналасқан, онда 4,8 мыңға жуық адам, соның ішінде қарт адамдар да өмір сүрген. Кешен 1980-жылдары салынған.
