АСТАНА. 27 қараша. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күнгі пленарлық отырыста Мәжіліс бұрын мақұлдаған «Қазақстан Республикасы Үкіметі мен Ресей Федерациясы Үкіметі арасындағы Челябинск мемлекеттік университетінің Қостанай қаласындағы филиалының қызметі туралы келісімді ратификациялау туралы» заңды қабылдады. Осылайша, заң Парламент тарапынан толық мақұлданып, Мемлекет басшысының қол қоюына жіберіледі.
Сенатор Алтынбек Нұхұлының айтуынша, Челябинск мемлекеттік университетінің Қостанай қаласындағы филиалы 2000 жылы 1999 жылғы «Білім туралы» заң негізінде құрылған. Келісімді ратификациялау филиалдың қызметін Қазақстан мен Ресей заңнамасына сәйкес лицензиялау мен аккредиттеуге, сондай-ақ білім беру бағдарламаларын қайта қарауға мүмкіндік береді. Филиалда «құқықтану», «лингвистика», «филология», «экономика» және «менеджмент» мамандықтары бойынша кадрлар даярланатын болады.
Сенатордың мәлімдеуінше, студенттерді қабылдау Ұлттық бірыңғай тестілеудің нәтижелері негізінде жүзеге асырылады. Түлектердің дипломдары мен біліктіліктерін тану Қазақстан мен Ресей қатысушы болып табылатын халықаралық шарттар мен екі елдің заңнамасына сәйкес жүргізіледі.
Мәжілістің әлеуметтік-мәдени даму және ғылым комитетінің қорытындысына сәйкес, келісімді ратификациялау Қостанайдағы Челябинск мемлекеттік университеті филиалының қызметі мен жұмыс істеу шарттарын реттеуге, сондай-ақ жоғары білім беру саласындағы ұзақ мерзімді ынтымақтастық пен халықаралық өзара іс-қимылды нығайтуға бағытталған.
Келісімге сәйкес, филиалда оқыту Қазақстан Республикасының жоғары білім берудің мемлекеттік жалпыға міндетті стандарттарына және Ресей Федерациясының федералдық мемлекеттік талаптарына сәйкес қазақ, орыс және басқа да тілдерде жүргізіледі; оқу орны міндетті түрде екі елдің заңнамасына сәйкес лицензияланып, аккредиттеледі; білім беру саласында мемлекеттік бақылау жүзеге асырылады; талапкерлерді қабылдау талаптары екі елдің заңнамасын ескере отырып белгіленеді; филиалдың қызметі оның өзіндік қаржысы мен тараптардың заңнамасында көзделген өзге де көздер есебінен қаржыландырылады.
Келісімді жүзеге асыру республикалық бюджеттен қосымша қаражат бөлуді талап етпейді, себебі филиал өз қызметін ақылы білім беру қызметтері есебінен жүргізеді.
