Дубай. 16 қыркүйек. ИНТЕРФАКС – Йемендегі «Ансар Аллах» қозғалысы (хуситтер) Сауд Арабиясы Әскери-әуе күштерінің F-15 жойғыш ұшағын Мариб провинциясының үстінде атып түсіргенін мәлімдеді. The National басылымының хабарлауынша, бұл туралы қозғалыстың әскери өкілі генерал Яхья Сари айтқан.
Яхья Саридің мәлімдеуінше, жойғыш ұшақ жергілікті өндірістің зениттік зымыранымен атып түсірілген. Кейін жоғалған ұшақты іздеуге Сауд Арабиясының F-15 және Eurofighter Typhoon жойғыштары келген. Хуситтер оларға да зымыранмен шабуыл жасап, әуе кеңістігінен кетуге мәжбүр еткенін айтады.
Сари сондай-ақ кейінгі бір аптада Сауд Арабиясының Әскери-әуе күштері Йемен аумағына 450-ден астам әуе соққысын жасағанын мәлімдеді. Оның айтуынша, Эль-Байда, Мариб, Таиз, Хадджа, Эль-Джауф және Лахдж провинцияларына соққы жасалған.
Ал араб коалициясының өкілі, генерал-майор Турки әл-Малики сейсенбі күні Сауд Арабиясының әуе қорғанысы Мекке маңында хуситтердің дронын атып түсіргенін хабарлады. Оның айтуынша, дрон қасиетті қаланың әуе кеңістігіне кірмей тұрып жойылған.
Турки әл-Малики Меккенің, қажылыққа келгендер мен қала қонақтарының қауіпсіздігі «қызыл сызық» екенін атап өтті. Оның сөзінше, бұл хуситтердің Меккеге шабуыл жасауға екінші талпынысы. Бұған дейін 2017 жылдың шілдесінде осы бағытқа баллистикалық зымыран ұшырылған.
Хуситтер араб коалициясының бұл айыптауын жоққа шығарды.
Өткен аптада хуситтер Йемен үкіметінің күштеріне қарсы шабуылға шығып, елдің Қызыл теңіз жағалауын түгелдей, сондай-ақ Баб-эль-Мандеб бұғазына іргелес аумақтарды бақылауына алған. Сонымен қатар хуситтер мен Сауд Арабиясы арасындағы өзара соққылар жалғасып жатыр.
