Мәскеу. 21 қыркүйек. ИНТЕРФАКС – Федералдық резерв жүйесі (ФРЖ) ұсыныс тарапынан жиілеп, ұзаққа созылып отырған күйзелістердің инфляцияны үдететін әсерін елеусіз қалдыра алмайды. Оған қарсы қабылданатын шаралар экономикаға ауыр тиюі мүмкін, деп мәлімдеді Чикаго Федералдық резерв банкінің (ФРБ) президенті Остан Гулсби.
«Ұсыныс тарапындағы күйзелістер жиілеп, күшейіп әрі ұзаққа созыла бастады», – делінген Гулсбидің Лондонда өтетін іс-шарада сөйлейтін сөзіне әзірленген және өзі басқаратын банктің сайтында жарияланған мәтінде.
Гулсбидің айтуынша, инфляцияға ықпал ететін күйзелістер тұрақты сипат ала бастағанда, реттеушінің оларды елемеуі баға тұрақтылығын қамтамасыз ету жөніндегі міндетін орындаудан бас тартумен тең.
«Стагфляциялық күйзеліс кезінде орталық банк жұмыспен қамту мен инфляцияның арасынан таңдау жасап, күрделі шешім қабылдауға мәжбүр болады. Өкінішке қарай, мұндай жағдайдан шығудың оңай жолы жоқ», – деді ол.
Оның айтуынша, ұсыныс тарапындағы күйзелістерге ФРЖ-ның жауабы сұраныстың шамадан тыс өсуіне қарсы шаралармен салыстырғанда жұмсақтау болуы мүмкін. Соған қарамастан, оның экономикаға салдары ауыр тиіп, жұмыспен қамтудың, жалақының және экономикалық өсім қарқынының төмендеуіне әкелуі ықтимал.
«Инфляцияны бәсеңдетудің жалғыз жолы – мөлшерлемелерді көтеріп, сұраныс пен ұсыныс арасындағы алшақтықты азайту. Экономика қайтадан тепе-теңдікке келуі үшін (…) адамдар жаңа әрі бұрынғыдан қолайсыз жағдайға бейімделуге мәжбүр болады, ал жалақы төмендеуі тиіс», – деді Гулсби.
16 қыркүйектегі отырыста АҚШ орталық банкі соңғы үш жылда алғаш рет базалық пайыздық мөлшерлемені көтеріп, оны 25 базистік тармаққа арттырды.
«Инфляция әлі де жоғары деңгейде қалып отыр. Бүгін қабылданған ақша-кредит саясаты шаралары инфляцияны 2% нысаналы деңгейге тезірек қайтаруға мүмкіндік береді. FOMC баға тұрақтылығын қамтамасыз етеді», – делінген реттеуші мәлімдемесінде.
ФРЖ-ның қыркүйектегі отырысының қорытындысы бойынша өткен баспасөз мәслихатында Федералдық резерв жүйесінің төрағасы Кевин Уорш бағаны тұрақтандыру орталық банктің басты міндеті болып қала беретінін атап өтті.
ФРЖ басшыларының медианалық болжамы бойынша, биыл жыл соңына дейін негізгі мөлшерлеме тағы бір рет көтерілуі мүмкін.
Гулсби биыл ақша-кредит саясаты бойынша шешім қабылдайтын Ашық нарықтағы операциялар жөніндегі федералдық комитеттің (FOMC) дауыс беретін мүшелерінің қатарына кірмейді. Дегенмен ол экономикалық болжам әзірлеуге қатысады.
