Дубай. 7 тамыз. INTERFAX – АҚШ пен Сауд Арабиясының Ирак аумағына жасаған соңғы соққыларынан кейін Иранды қолдайтын қарулы топтардың Бағдадтан елдің егемендігін қорғау жөнінде шаралар қабылдауды талап еткен ультиматумының мерзімі аяқталуына байланысты Ирак билігі қарулы күштер мен қауіпсіздік құрылымдарын күшейтілген қызмет режиміне көшірді. Бұл туралы жұма күні The National басылымы хабарлады.
Бұған дейін Ирак премьер-министрі Әли әз-Зейди қауіп-қатер деңгейінің артуына байланысты барлық қарулы күштерді жоғары жауынгерлік әзірлік режиміне көшіру туралы тапсырма берген.
Сондай-ақ бейсенбі күні Ирак қарулы күштерінің өкілдері терроризмге қарсы құрылымдармен және «Халықтық жұмылдыру күштері» ұйымының өкілдерімен қауіпсіздік шараларын күшейту мәселесін талқылады. Кездесу қорытындысы бойынша тараптар Ирак аумағының трансшекаралық шабуылдарды ұйымдастыруға немесе ел ішіндегі қарулы әрекеттерге пайдаланылуына жол бермеу жөніндегі шараларды күшейтуге келісті.
Сол күні «Ирактың исламдық қарсылығы» қозғалысының Бағдадқа қойған бір апталық ультиматумының мерзімі аяқталды. Қозғалыс Ирак үкіметінен Эр-Риядқа қатысты нақты шаралар қабылдауды талап еткен болатын. Талаптар орындалмаған жағдайда ұйым тиісті әрекеттерді өз бетінше жүзеге асыратынын мәлімдеген.
Шілде айының соңында Сауд Арабиясының Қорғаныс министрлігі Ирак аумағынан ұшырылған және корольдіктің Шығыс провинциясындағы мұнай нысандарына бағытталған ұшқышсыз ұшу аппараттарының жойылғанын хабарлады. Осыдан кейін Сауд Арабиясының қарулы күштері АҚШ Қарулы күштерінің Орталық қолбасшылығымен бірлесіп, Ирактағы Иран қолдайтын қарулы топтардың нысандарына соққы жасады.
АҚШ президенті Дональд Трамп операцияның Бағдадпен келісілгенін мәлімдегенімен, Ирак билігі бұл әрекетті айыптады. Ирак тарапының мәліметінше, шабуылдар салдарынан кемінде 20 адам қаза тауып, олардың арасында Иранның бес әскери кеңесшісі болған. Сонымен қатар ондаған адам жарақат алған. Ирак үкіметі мен «Халықтық жұмылдыру күштері» өкілдері Сауд Арабиясына жасалған шабуылдың шынымен Ирак аумағынан ұйымдастырылғанын растайтын дәлелдер ұсынуды талап етті.
Бұған дейін Al Arabiya және CNN телеарналары дереккөздеріне сілтеме жасап, Сауд Арабиясы корольдікке қарсы шабуылдардың дайындалып жатқаны туралы барлау мәліметтерін алғанын хабарлаған. Мәліметтерге сәйкес, мұндай шабуылдарға хуситтер, Ирактағы қарулы топтар және Иран Ислам революциясы сақшылар корпусының қатысы болуы мүмкін.
