Иерусалим. 9 шілде. ИНТЕРФАКС – Израиль мен ХАМАС арасындағы атысты тоқтату және тұтқындарды босату жөніндегі келісімге қатысты Катар астанасы Дохада өткен жанама келіссөздердің бесінші кезеңі айтарлықтай нәтижесіз аяқталды. Бұл туралы The Times of Israel басылымы хабарлады.
Басылым дереккөздеріне сілтеме жасай отырып, Катарда өткен бұл келіссөздер кезеңі атысты тоқтату мен кепілдегі азаматтарды босату бойынша келісімге қол жеткізуде елеулі ілгерілеу әкелмегенін жазды.
Палестиналық өкілдің айтуынша, келіссөз процесі тұйыққа тірелген, себебі«Израиль делегациясының шешім қабылдау құзыреті жоқ және олар әрбірмәселені Тель-Авивпен келісуге мәжбүр». Бұл жағдайды палестиналық тарап Израильдің келісімге қол жеткізуге әдейі кедергі жасап отырған әрекеті деп бағалап отыр.
Сонымен қатар, АҚШ президентінің Таяу Шығыстағы арнайы өкілі Стив Уиткоффтың сейсенбі күні Дохаға жоспарланған сапарын кейінге қалдырғаны белгілі болды. «Америкалық дипломат келіссөздерді қорытындылау үшін Катарға баруды жоспарлап отыр, алайда сапарының кейінге қалдырылуы келіссөздерде әзірге айтарлықтай ілгерілеу жоқ екенін аңғартады», – деп жазады басылым.
Осыған дейін Уиткофф келісім осы аптаның соңына дейін дайын болуы мүмкін екенін айтқан еді.
Өз кезегінде Sky News телеарнасы Израиль мен ХАМАС арасындағы жалғыз шешілмеген мәселе – Израиль армиясының (ЦАХАЛ) Газадағы мәртебесімен әскери қатысуы екенін хабарлады.
Телеарна дереккөздерінің мәліметінше, тараптар гуманитарлық көмек жеткізу тәртібі және Израильдің 60 күндік уақытша бітімнен кейін әскери қимылдарды қайта бастамайтыны туралы АҚШ-тың кепілдігін алу мәселелері бойынша ортақ шешімге келген.
