Астана, 27 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Астанаға ресми сапармен келген Иордания Королі Абдалла ІІ-мен тар құрамда келіссөз жүргізді.
«Бүгінгі кездесуде екіжақты күн тәртібіндегі бірқатар маңызды мәселелерді талқылаймыз. Кеше біз екі ел арасындағы қарым-қатынастардың өзекті бағыттары мен халықаралық күн тәртібіндегі жайттар бойынша мазмұнды әрі сындарлы әңгіме өрбіттік. (…) Бүгін сол пікір алмасуды жалғастыруға жақсы мүмкіндік болады деп есептеймін», – деді Мемлекет басшысы.
Қасым-Жомарт Тоқаев Қазақстан мен Иордания арасындағы қарым-қатынастың табысты дамып келе жатқанын атап өтті.
Өз кезегінде, Король Абдалла ІІ екі ел арасындағы ынтымақтастықты одан әрі нығайтудың маңыздылығына тоқталып, өзара тиімді сауда-экономикалық байланыстарды тереңдетуге ниетті екенін білдірді.
