ИЕРУСАЛИМ, 12 шілде. ИНТЕРФАКС. Израиль премьер-министрі Биньямин Нетаньяхудың кеңсесі америкалық The New York Times газетінің айыптауларына жауап ретінде көлемді мәлімдеме жариялап, басылымды сынға алды. Онда премьердің Газадағы соғысты жалғастырып отырғаны туралы материалға қарсы уәждер келтірілген.
The Times of Israel басылымының хабарлауынша, Нетаньяху кеңсесі бұл жарияланымда «Израильді, оның ержүрек халқын және премьер-министрді қаралайтын, көптен бері теріске шығарылған және жалған айыптаулар» қайталанғанын мәлімдеген.
Мәлімдемеде Нетаньяху мен оның министрлер кабинеті қабылдаған стратегиялық шешімдер «Израиль тарихындағы ең ірі әскери жетістіктердің біріне» әкелгені айтылған. Кеңсе Газа секторындағы ХАМАС-қа қарсы операциялар, «Хезболла» пейджерлерін жою, осы ұйымдардың жетекшілерін көзін жою және «ең бастысы – Иранның ядролық бағдарламасы мен баллистикалық зымыран қаупіне қарсы нақты әрекеттерді» үкімет басшысының жетістігі ретінде атап өткен.
Сондай-ақ, құжатта премьердің әрекеттерінің арқасында ХАМАС тұтқынында болған 255 адамның 205-і босатылғаны, ал қалған 50 тұтқынның ішінде 20-сы тірі екені және олардың барлығын елге қайтару үшін жұмыс жалғасып жатқаны айтылған.
«Премьер-министр Нетаньяху ешқашан өзінің саяси болашағын ойлаған емес, ол әрдайым өмірлік миссиясына – еврей мемлекетінің амандығы мен болашағына қызмет етуге ұмтылды», – делінген мәлімдемеде.
Бұған дейін The New York Times басылымы Биньямин Нетаньяхуды «саяси амбициясын сақтау мақсатында» Газа секторындағы келіссөздерді кейінге қалдырып, әскери қимылдарды жалғастырып жатыр деп айыптаған еді. Газет дерегінше, премьер-министр қаңтар айында ХАМАС-пен жасалған уақытша бітімді бұзып, Израиль армиясының әскери басшылығы соғысты тоқтатуды қолдағанына қарамастан, операцияларды жалғастыруды жөн көрген.
The Times of Israel мәліметінше, премьердің кеңсесі бұл мәлімдемені алғаш сенбіге қараған түні ағылшын тілінде жариялап, кейінірек еш түсініктемесіз өшіріп тастаған.
