Дубай, 10 маусым. ИНТЕРФАКС — Пәкістанның ақпарат министрі Аттаулла Тарар сәрсенбі күні ел әскері Ауғанстан–Пәкістан шекарасы маңында орналасқан пәкістандық Техрик-е Талибан (ТТП) тобының жасырын орындарына соққы жасағанын мәлімдеді.
Министрдің X әлеуметтік желісінде жазуынша, Пәкістан аумағындағы соңғы террористік шабуылдардан кейін әскери күштер шекара бойындағы аудандарда ТТП жетекшілері мен қолбасшыларының базалары мен жасырын бекіністеріне дәл соққылар берген.
«Біз Үндістан қолдайды деп есептелетін 26 қарсылас жауынгерді жойдық», – деп жазды Тарар.
Оның айтуынша, төрт нысан, соның ішінде жаттығу лагері мен қару-жарақ қоймасы жойылған. Министр Пәкістанның ұлттық қауіпсіздігіне төнетін қатерлерді жоюға бағытталған шаралар жалғасатынын атап өтті.
Тарардың мәліметінше, операция сейсенбі күні Пешавар қаласындағы шекара полициясының бекетіне жасалған шабуылға жауап ретінде де жүргізілген. Аталған шабуыл кезінде алты қызметкер қаза тауып, үш шекарашы тұтқынға алынған. Қарымта оқ кезінде сегіз шабуылдаушының көзі жойылған.
Ал Ауғанстан билігінің хабарлауынша, сәрсенбіге қараған түні Пәкістан әскери-әуе күштері елдің шығыс бөлігіне әуе соққыларын жасаған. Соның салдарынан 13 адам қаза тауып, олардың 11-і балалар болған.
Ұзындығы шамамен 2,6 мың шақырымды құрайтын Ауғанстан–Пәкістан шекарасындағы жағдай бірнеше жылдан бері күрделі күйінде қалып отыр. 2025 жылдың қазан айында бұл аумақта ірі қақтығыстар болған.
Пәкістан бұған дейін де Ауғанстан аумағына соққы жасап, олардың мақсаты ТТП базалары мен Белуджистанды азат ету армиясы ұйымының нысандары екенін мәлімдеген. Исламабад Кабулды Үндістанмен үйлесімді әрекет етті деп айыптап келеді.
Өз кезегінде Ауғанстан билігі бұл айыптауларды жоққа шығарып, өз аумағының басқа мемлекеттерге қарсы пайдаланылуына жол бермейтінін мәлімдеген. Сонымен қатар Кабул Пәкістанды Ауғанстан үкіметіне қарсы күштерді қолдайды деп айыптайды.
Пәкістанның Dawn басылымы Қытайдың Исламабад пен Кабул арасындағы диалогқа арағайындық жасап отырғанын еске салды. Сәуір айында Үрімші қаласында тараптардың кездесуі өтіп, содан кейін жағдайдың шиеленісуі біршама бәсеңдеген болатын.
Басылым дереккөздерінің мәліметінше, Қытай жақын уақытта осындай форматтағы екінші кездесуді ұйымдастыруды жоспарлап отыр.
