Астана, 10 маусым. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев 2029 жылға дейінгі «Digital Qazaqstan» ауқымды цифрландыру және жасанды интеллект технологияларын жаппай енгізу жөніндегі жалпыұлттық стратегияны бекіту туралы жарлыққа қол қойды.
Жарлық мәтіні сәрсенбі күні ресми бұқаралық ақпарат құралдарында жарияланды.
Стратегия Мемлекет басшысының 2025 жылғы 8 қыркүйектегі «Жасанды интеллект дәуіріндегі Қазақстан: цифрлық трансформация арқылы өзекті міндеттерді шешу» атты Қазақстан халқына Жолдауын іске асыру жөніндегі жалпыұлттық іс-шаралар жоспарына сәйкес қабылданды.
Құжат еліміздің жаңа технологиялық өзгерістерге уақытылы бейімделуін қамтамасыз етуге бағытталған жүйелі стратегиялық құжат болып табылады. Сонымен қатар бірқатар бағыттар бойынша озық дамуды қалыптастырып, Қазақстанның жаһандық цифрлық экономикадағы бәсекелік артықшылықтарын нығайтуды көздейді.
Стратегияның негізгі мақсаты – Қазақстанды технологиялық егемендігі қалыптасқан, деректер экономикасы дамыған және бәсекеге қабілетті жасанды интеллект индустриясы бар жетекші цифрлық мемлекет ретінде орнықтыру. Бұл өз кезегінде азаматтардың өмір сүру сапасын арттыруға, экономиканың өнімділігін көтеруге және мемлекеттік басқарудың тиімділігін күшейтуге ықпал етуі тиіс.
Құжатта стратегияны іске асырудың негізгі қағидаттарының бірі ретінде нарықтық тетіктер мен жеке бастамаларға сүйену белгіленген. Мұндай тәсіл бюджетке түсетін жүктемені азайтуға, тұрақты нарықтық ынталандыруларды қалыптастыруға, ұлттық ІТ саласының бәсекеге қабілеттілігін арттыруға және ұзақ мерзімді мультипликативтік әсерге қол жеткізуге мүмкіндік береді.
Үкіметке, Президентке тікелей бағынатын және есеп беретін мемлекеттік органдарға, сондай-ақ орталық және жергілікті атқарушы органдарға үш ай ішінде стратегияны іске асыру жөніндегі іс-қимыл жоспарын әзірлеп, бекіту тапсырылды.
Стратегияның негізгі көрсеткіштеріне қол жеткізу үшін дербес жауапкершілік мемлекеттік органдардың бірінші басшыларына жүктелді.
Жарлық қол қойылған күнінен бастап күшіне енді.
