Вашингтон. 7 мамыр. ИНТЕРФАКС – Қазіргі таңда Парсы шығанағы аймағында жалпы саны 20 мыңға жуық теңізші отырған шамамен 1,6 мың кеме Ормуз бұғазы арқылы өте алмай, кептеліп қалған.
Телеарнаның мәліметінше, Дональд Трамп жариялаған коммерциялық кемелерді бұғаз арқылы алып өтуге арналған АҚШ-тың «Бостандық» әскери операциясы небәрі 48 сағатқа созылған. Дүйсенбіден бері АҚШ әскери-теңіз күштері Парсы шығанағынан тек екі кемені ғана шығара алған.
Қазір америкалық әскери сүйемелдеусіз қалған кеме компаниялары транзит тәуекелін өз мойнына алудан бас тартып отыр. Себебі жүк пен экипаж қауіпке тігіледі.
CNN мәліметінше, құны миллиондаған доллар болатын кемелерге зақым келсе, бұл компанияларға ірі қаржылық және логистикалық шығын әкеледі. Оның үстіне сақтандыру келісімдері әскери қимылдарға байланысты жағдайларды қамтымайды. Сондықтан мұндай қаржылық қорғаныссыз кеме қатынасын жалғастыру аса қымбатқа түсуі мүмкін.
Port of Los Angeles портының атқарушы директоры Джин Серокидің айтуынша, америкалық әскери күзетпен болса да, Ормуз бұғазы арқылы өту үшін кеме компанияларына қауіпсіздікке әлдеқайда жоғары сенім қажет.
БҰҰ жанындағы Халықаралық теңіз ұйымы дерегіне сәйкес, әскери қақтығыстар басталғалы бері Ормуз бұғазы маңында 32 кеме зымыран шабуылына ұшыраған. Соның салдарынан 10 адам қаза тауып, кемінде тағы 10 адам жараланған.
Ұйым кемелерді «аса жоғары сақтық танытуға» шақырып, «әскери сүйемелдеу ұзақмерзімді тұрақты шешім емес» екенін мәлімдеді.
