Астана, 21 қаңтар. ИНТЕРФАКС-ҚАЗАҚСТАН — Қазақстан Премьер-министрі Олжас Бектенов ел өңірлерінде үш жылу электр орталығын (ЖЭО) салу жобалары бойынша қаңтар айының соңына дейін келісімшарттар жасасуды тапсырды.
«“Самұрық-Қазына” қорына қаңтар айының соңына дейін Көкшетау, Семей және Өскемен қалаларында ЖЭО салу жобаларын іске асыруға арналған келісімшарттарды жасасуды тапсырамын. Құрылыс жұмыстары сәуір айында басталуы тиіс», — деді Олжас Бектенов сәрсенбі күні Үкімет отырысында.
Сондай-ақ Премьер-министр биылғы жылы Курчатов қаласындағы ЖЭО және Екібастұздағы ГРЭС-3 жобалары бойынша техникалық құжаттаманы әзірлеуді аяқтауды тапсырды.
Бұған дейін хабарланғандай, Екібастұз ГРЭС-3 станциясының қуаты 2,64 ГВт, Курчатов қаласындағы жаңа станцияның қуаты 700 МВт, Көкшетаудағы жылу электр орталығының қуаты 240 МВт, ал Семей мен Өскемендегі ЖЭО-лардың әрқайсысының қуаты 360 МВт болады деп жоспарланған.
Қазақстан үш ЖЭО-ның құрылысын Ресей Федерациясымен бірлесіп жүзеге асыруды көздеген, сондай-ақ РФ Үкіметінен субсидияланатын қарыз алу мәселесі пысықталған. Алайда жоба бойынша келіссөздер созылып кеткені атап өтілді.
