Президент Тоқаев: Үкімет қазақстандық стартаптарды жаһандық нарыққа шығаратын экожүйе қалыптастыруы тиіс

Астана. 24 қазан. ИНТЕРФАКС-ҚАЗАҚСТАН.  Қазақстан Үкіметі отандық стартаптарды халықаралық деңгейге шығару үшін заманауи инфрақұрылым мен тиімді инновациялық экожүйе қалыптастыруы қажет. «Жас кәсіпкерлер, ғалымдар, инженерлер мен IT-мамандар елімізде жаңа буын элитасына айналып келеді. Инновация – ұлттық болмысымыздың маңызды сипатының бірі. Бірақ жекелеген жетістіктермен шектелуге болмайды. Сондықтан Үкімет алдында ең заманауи әрі нәтижелі экожүйе құрып, қазақстандық стартаптардың әлемдік нарықта жоғары бағалануына жағдай жасау міндеті тұр», – деді Президент.
Қасым-Жомарт Тоқаев мысал ретінде Higgsfield AI компаниясын атап өтті. Ол – құны 1 миллиард АҚШ долларынан асқан алғашқы қазақстандық “единорог” стартап. «Бұл бірегей жоба Astana Hub алаңында дүниеге келді. Оның негізін қалаушылар – халықаралық жасөспірімдер олимпиадаларында жеңіске жеткен, математика мен физикаға бейімі жоғары талантты жастар. Осындай жандар – еліміздің болашағы. Мемлекет қолдау көрсетсе, білім мен еңбекқорлық бар жерде біздің ұл-қыздарымыз әлемдік нарыққа қажетті жоғары технологиялық өнім шығара алатынын бұл мысал дәлелдеп отыр», – деді Мемлекет басшысы.