АСТАНА, 12 шілде. ИНТЕРФАКС-ҚАЗАҚСТАН. Қарағанды облысындағы су тарту желілерін жөндеуге заңсыз шетел асқан және елге қайтарылған активтерден 5,1 млрд теңге бағытталды. Бұл жөнінде Қазақстан Үкіметінің баспасөз қызметі хабарлады.
«Мемлекет басшысының инфрақұрылымды дамыту және халықты сапалы ауыз сумен қамтамасыз ету жөніндегі тапсырмасын орындау аясында Үкімет арнайы мемлекеттік қор қаражатынан Қарағанды облысындағы су құбырларын салу және қайта жаңғырту үшін 5 млрд теңгеден астам қаржы бөлді», – делінген сенбі күні жарияланған ресми хабарламада.
Үкіметтің мәліметінше, бұл қаржы заңсыз жолмен шетелге шығарылып, кейін елге қайтарылған активтер есебінен бөлініп отыр.
Жобалар облыстың бірнеше елді мекенінде жүзеге асырылуда: Қарағанды қаласында, сондай-ақ Тихоновка, Садовое, Колхозное, Актерек, Әлихан ауылдарында және Көктенкөл станциясында құрылыс-монтаж жұмыстары жүргізілуде.
«Жұмыстар су жүйелерінің тозу деңгейінің жоғары болуына байланысты қолға алынған. Көптеген желілер ондаған жыл бойы күрделі жөндеусіз пайдаланылып келген, бұл апаттарға, судың жиі тоқтап қалуына және тұрғындардың наразылығына себеп болған. Жөндеу жұмыстары жыл соңына дейін толық аяқталады деп жоспарлануда», – делінген үкімет таратқан ақпаратта.
Айта кетейік, 2022 жылғы қарашада Президент жарлығымен арнайы мемлекеттік қор құрылған болатын. Бұл қорға шетелден қайтарылған заңсыз активтер түсіп, халықтың әл-ауқатын арттыруға бағытталған әлеуметтік-экономикалық жобаларға жұмсалады.
Ұлттық банк белгілеген 12 шілдедегі ресми валюта бағамы бойынша 1 АҚШ доллары – 520,93 теңге.
