Астана. 11 наурыз. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күнгі пленарлық отырыста «ТМД-ға қатысушы мемлекеттердің радиациялық жағдай мониторингі деректерімен алмасу кезіндегі өзара іс-қимылы туралы келісімді ратификациялау туралы» заңды қабылдады.
Келісім 2023 жылғы 8 маусымда Сочи қаласында қол қойылған.
Мәжілістің Экология және табиғатты пайдалану мәселелері комитетінің қорытындысында айтылғандай, құжат аясында тараптар радиациялық жағдай туралы деректермен алмасу бойынша уәкілетті органдардың өзара іс-қимылын ұйымдастыруы тиіс. Сонымен қатар радиациялық жағдайдың жай-күйі мен оның өзгерістері туралы өзекті ақпарат ұсынылып, радиоактивті заттардың трансшекаралық таралу қаупі немесе фактісі туындаған жағдайда, оның ішінде үшінші елдердің аумақтарымен байланысты жағдайлар бойынша да деректер алмасу қарастырылған.
Бұдан бөлек, құзыретті органдар деректер алмасудың бірыңғай тәртібін әзірлейді. Онда берілетін ақпараттың тізбесі, деректер форматы, оларды архивтеудің мерзімдері, ТМД-ға қатысушы мемлекеттердің аумағындағы радиациялық жағдай параметрлері туралы ақпаратты беру регламенті, сондай-ақ уәкілетті органдардың байланыс деректері қамтылуы тиіс.
Заң жобасы Парламент Сенатының қарауына жолданады.
